Տաղ ղարիպի

Վայրի հաւուկ մի բռնած եւ բերած,
Եւ դրած զինքն ի նեղ զնդան.
Լալով ասէր թէ. -
Լացեք, բաժանիլ յընկերացս որ չեմ յիմ յերամս:

Սրտաբեկեալ եւ միջակոտոր ճար չունիմ
Զինչ լինիմ գերիս, զինչ լինիմ ղարիպս:

Եթէ հարիւր հազար գոյն զգոյն փետուր
բերած` ինձ խալաթ կուտան,
Չուրախանայ սիրտ բաժանելոյս
յընկերացս, որ չեմ յերամս:

Եթէ հարիւր հազար կտրիճ էր բերած
Ինձ հեծեալ ձիաւոր,
Չուրախանայ սիրտ բաժանելոյս
յընկերացս, որ չեմ յերամս:

Եթէ մճլիս էր բերած ծեփած ոսկով,
զարդարած անգին մարգարտով,
Չուրախանայ սիրտ բաժանելոյս
յընկերացս, որ չեմ յերամս:

Եթէ զբլբուլն ու զղումրին էր բերած,
Ինձ երգասաց գուսան,
Չուրախանայ սիրտ բաժանելոյս
յընկերացս, որ չեմ յերամս:

Եթէ շաքարն էր մաղած եւ շաղած նշով
Ինձ կերակուր կուտան,
Չուրախանայ սիրտ բաժանելոյս
յընկերացս, որ չեմ յերամս:

Ապայ լինիմ որ թռչիմ ազատ,
վերանամ խառնեմ յիմ յերամս,
Չուրախանայ սիրտ բաժանելոյս
յընկերացս, որ չեմ յերամս:

Շուրջ առեալ եւ օրհնեալ եմ զաստուած
Անդադար ւ՚ իջնումն յիմ մուղամս,
Զարթնում ի քնոյ զերդ տղայ տխմար,
Որ կրկին եւ օրհնեմ զաստուած որ հասայ երամս:

Չուրախանայ սիրտ բաժանելոյս
յընկերացս, որ չեմ յերամս:
Յայնժամ ուրախանայ սիրտ բաժանելոյս
յընկերացս, որ հասայ յերամս,
Չուրախանայ սիրտ բաժանելոյս
յընկերացս, որ չեմ յերամս: