Հայ Մամուլի Մատենագիտական Գործեր

Բազմաթիւ մանր սխալներ կան որոնք ուշադիր ընթերցողին կողմէ կրնան ուղղուիլ։ Մենք կ՚անդրադառնանք կարեւորներուն։

Արժենդին եւ Արժենթինեան մամուլ թերթերուն տարեթիւերը իրարու հետ շփոթուած են։ Արժենթինեան մամուլը լոյս տեսած է 1924ին եւ Բ. հատոր էջ 391-ի մէջ տեղեկութիւն կը տրուի իր մասին, իսկ Արժենդին թերթը 1930-ին, էջ 437։ Նոյն ձեւի սխալով մը տեղ փոխած են Որբունի եւ Որբի ձայն թերթերը (էջ 619)։

Վրիպակներ սպրդրած են մանաւանդ օտար լեզուով լոյս տեսած թերթերու տեղեկութեանց մէջ։ Սխալներ կան նաեւ օտար բառերու տառադարձութեանց, կամ աւելի ճիշդը՝ հնչումի մէջ։ Institut բառը գրուած է հայերէնով Ինսդյուտիվ։

Երբեմն ռուսերէնով տրուած բացատրութիւններուն մէջ թերթին հրատարակութեան թուականին պարագային անճշդութիւններ կան։ Երբեմն ալ նոյն անունը կրող թերթերուն ժամանակագրական կարգը չէ պահուած։

Այս դիտողութիւնները կ՚ընենք որպէսզի յաջորդ հրատարակութիւններուն պարագային լուրջ սրբագրութեան ենթարկուի գործը։

Նմանօրինակ սխալներ պիտի ըլլան միշտ ալ։ Բայց նկատի պէտք է առնել, որ մատենագիտական աշխատասիրութիւններ ամէնօրեայ գործածութեան սահմանուած են եւ ուրեմն պէտք է կարենան ըստ կարելւոյն վաւերական եւ լրիւ տեղեկութիւններ հաղորդել։ Ամէն ընթերցող նիւթին մասնագէտը չի կրնար ըլլալ՝ անհրաժեշտ սրբագրութիւններէն ետք գործածելու տուեալ աշխատասիրութիւնը։

Երբ հանդիպած ենք կրճատուած անուններու եւ տեղեակ եղած ենք այդ անուններուն, կատարած ենք անհրաժեշտ ճշդումը։