Բանաստեղծութիւններ

Իմ սիրելիքն` գոչեցէք ջան,
Մեծ աւետիս ես նոցա տամ.
Զի այսօր է բարեկենդան,
Որ է օր մեծ ուրախութեան:

Պարտ է այսօր ուրախանալ,
Զի հայրապետքն են կանոնեալ.
Ոչ ոք կարէ հակառակ կալ
Եւ նզովից տակն մնալ:

Եկայք եղբարք, իմ սիրելիք,
Պարտ է գինուն մեզէն հոգալ.
Դէպի պաղճան սէյրան երթալ,
Հետ սիրելեացն զուարճանալ:

Տաղ, շարական եւ խաղ երգել,
Անուշ գինով թասը լեցնել,
Տալ սիրելի եղբօր ձեռն,
Անուշ, անուշ վերան ձայնել:

Ուրախութեամբ բազմիլ սեղան,
Լի կերակրով յոյժ բազմազան.
Ծաղկունքն բուրեն հոտ զանազան
Զոր տեսանողքն հիանան:

Ելէք երթանք այսինչ գետնէն,
Նստէնք ծաղկեալ մէջ չարտախին,
Ձուկն հանենք տանք կրակին,
Մեզէ անենք, խմենք գինին:

Գինին եթէ չափով խմես,
Հետ կերակրոյն յարմար դասես
Եւ ոչ հնգէն աւելցնես,
Հոգիդ յանձին քում դուրանայ
Եւ ցնծութիւն կից միանայ: