Գանձեր եւ Տաղեր

ԺԱ. ՏԱՂ ՅԱՐՈԻԹԵԱՆ, ԳՐԻԳՈՐԻ ՆԱՐԵԿԱՑՒՈՅՆ ԱՍԱՑԵԱԼ

Սէր յառաւաւտէ,

Սէր յառաւաւտէ ճեմեալ

Իւր անձուկ ծագմամբ;

 

Ծագմանն արեւելք,

Ծագմանն արեւելք   անուն

Այն արուսեկին։

 

Մի՞թէ յայն ի վայր,

Մի՞թէ յայն ի վայր   վայրի

Տաւիղ տարածեալ.

 

Կամ սիրոյ շրջան,

Կամ սիրոյ շրջան առեալ

Աստեղբք բոլորեալ։

 

Նա ծով  վաղընթաց,

Նա ծով վաղընթաց ածեալ

Դուռն արեւելեան.

 

Ծայրարձակ լերանց,

Ծայրարձակ լերանց բարձանց

Ցաւղ տարածանէր։

 

Արեւմըտենի,

Արեւմըտենի սեռի

Լրմամբ միացեալ,

 

Աղերս ձայնաղի,

Աղերս ձայնաղի առնէր

Ի ծայրս արեւու։

 

Ի զարդ շաւիղից,

Ի զարդ շաւիղից փայլեալ

Ոսկէթել շողից,

 

Շող երփն առ երփին,

Շող երփն առ երփին փողով

Հովիտ շուշանի։

 

Զարդ փայլենազարդ,

Զարդ փայլենազարդ փայլից

Գայր յարեւելից.

 

«Մի՛ դու նուաղենար,

Մի՛ դու նուաղենար, լուսի՛ն

Զարդ գիշերայնոյ։

 

Ես սիրոյ պատգամ,

Ես սիրոյ պատգամ ունիմ,  

Գիր ողջունաբեր»

 

Լերին նմանեալ հովիտ,

Լերին նմանեալ հովիտ

Սէր եղբաւրորդւոյն։

 

Վարսս մանր անձրեւով,

Վարսս մանր անձրեւով լցեալ,

Յեռմամբ մարգարտով,

 

Գանգուր սոկէփող,

Գանգուր ոսկէփող կիտուած

Սափիրանափայլ։

 

Ի մէջ բուրաստանաց,

Ի մէջ բուրաստանաց վարդից

Հիւթ առ հիւթ թերթից,

 

Թերթ վարդին ի սաւս,

Թերթ վարդին ի սաւս վարդի

Ի փայտս անտառից։

 

Հարաւ քաղցրասիգ,

Հարաւ քաղցրասիգ շնչէր

Ծով ծաւեալ ի նոյն

 

Այծեման նման դառնայր,

Այծեման նման դառնայր

Խնկաբեր լերանց։

 

Զանուշահոտութիւն,

Զանուշահոտութիւն խնկոց

Ի մէջ տարածէր,

 

Եղնորթու նման,

Եղնորթու նման հանգչէր,

Ընդ քրքմաւք տաւաղէր։

 

Վիմին հովանեաւ,

Վիմին հովանեաւ գտի

Ի ծովուն յալիս,

 

Ի միջաւրէի,

Ի միջաւրէի գտի՝

Խանդակաթ սիրով

 

Բարձր ի վեր դիտին,

Բարձր ի վեր դիտին ննջէր

Ընդդէմ Փառանու,

 

Խայտար խնծորով սիրոյ,

Խաղ առնէր ի վայր։

 

Խաղալով դառնայր,

Խաղալով դառնայր եւ գայր

Ըզսէր իւր յայտնէր։