Գանձեր եւ Տաղեր

Ի. ՏԱՂ ԵԿԵՂԵՑԻՈՅ, ԳՐԻԳՈՐԻ ՆԱՐԵԿԱՑՒՈՅ

Յառաջ քան շարժիցն՜ աներբ էիցըն կայք

Աւրէն խորհրդոյ եւ հրաւիրող բարեաց.

Բանին վեր առեալ իմաստութեամբ կազմեալ,

Զերբիցն եղանիւր եթերական կամաւ

Անճարիցըն ճարն ճարտարապետեալ եռահիւսակ զարդիւք,

Խաղացմամբ ի վայր գա՜յր հասանէր աւուրբք։

Յիմաստնահաւրէն` շառաւիղէն Դաւթի

Սողոմոն արքայն, մեծ քերական պերճիւք

Զարդարեալ ըզսա վայելալից փառաւք։

Վէմս ի սմա կանգնեալ եւթն աղաւնւոյ աչաւք

Թագիւ թագ կապեալ խիտ խորանի ակամբ։

Հաւ պերճաբարոյ ցոփինաճեմ

Սեգ առեալ ի խաղ` այն սիրամարգն ասէր

— Ո՞վ է համբարձեալ զպարանոցն իւր յաւդս։

Ես հապա ի բաց, ես հապա ի բաց գնամ`

յիմ յաշխատացեալ յալեւորէն եկեալ։

Արփիատեսիլ ճառագայթիւք փայլեալ

Ծիր ի ծիրայնւոյ վառի վառեալ ըզդէմս։

Թեւական նման, արեգական նըման,

Կաթուած գեղեցիկ ի քեզ կաթէ զըմուռ։

  Գեղեցկապաճոյճ մեզ քաւարան կազմեալ

Եթերանըման կամարակապ զարդիւք։

Չորիւք հիւսակաւք հրաշազարդեալ սեղան

Կանգնեալ քառանկիւն զարմանասքանչ հրաշիւք։

Ի քեզ է բազմեալ թագաւորաց արքայն,

Որում ոչ բաւեն երկինք անբաւ բանին։

Բաշխէ զփրկաւէտ զկենդանարար զմարմինն,

Սուրբ զանմահարար զանապական արիւնն։

Ակումբ են առեալ զքեւ. երկնային զաւրացն,

Ահիւ սարսափմամբ ծածկեն ըզդէմս իւրեանց։

Փառս ի վեր երգեն եղանակաւ ձայնիւ

Բանիւ հաստողին առ հասարակ էիցս։

Քրիստոսի փրկչին` պըսակողին ըզքեզ`

Վայելէ պատիւ, փա՜ռք յաւիտեանս. ամէն։