Գանձեր եւ Տաղեր

ԼԱ. ՔԱՐՈԶ ՀԱՄՕՐԷՆ ՍՈԻՐԲ ԱՌԱՔԵԼՈՑՆ, ԳՐԻԳՈՐԻ ՎԱՐԴԱՊԵՏԻ

Գանձ փառաց խորհրդոյ ինքնածագ լուսոյն,

Գտեալք ի սկզբանէ եւ ծածկեալք առ Հաւր յաւիտեանս,

Ի լրումն ժամանակաց յայտնեալք եւ կոչեցեալք յՈրդւոյ,

Ճոխացուցիչք տիեզերաց եւ լուսաւորիչք ընդհանուր ազգաց եւ ազանց.

Առաքեալք սուրբք Առաքելոյն ի յերկնից`

Ի խնդիր մերոյս կորուսեալ բնութեանս.

Կայցեմք զողորմութիւն առ ի մէնք հաւատացելոցս`

Ի Քրիստոսէ, աղաչեմք։

 

Րաբունիք բարի եւ հրաւիրակք մահացելոցս յանմահութիւն,

Որ նախ քան զսկիզբն Էիցս ընտրեցայք իսկապէս եւ հաճոյացայք,

Անհամեմատ գերազանցութեամբ փառազարդ գոլով լուսանիւթիցն`

Ի յերկինս բոցեղէնացն.

Զանծայրափակ էական ծագումն նիւթիւ պարագրեալ ի մարմնի տեսէք,

Եւ ի վերնատունն, ձեռամբ բարձրելոյն, զբաժակն արբէք զանմահացուցիչ.

Եւ համայն սեռի մարդկութեանս`

Զկենդանականն մատռուակեցէք զարբումն:

Հազարապետք մեծի խորհրդոյն

Եւ վարժմամբ աստուածայնովքն լցեալ իմաստիւք,

Քարոզողք տնտեսութեան ի մեզ միացելոյ բանին.

Հայցեմք զողորմութիւն առ ի ձէնջ հաւատացելոցս`

Ի Քրիստոսէ, աղաչեմք։

 

Ի վերին կարգեալ պետութիւնս հրեշտակացն գոլով համապատիւք,

Ի հանդերձեալ յաւիտենին ի փառս Որդւոյն Աստուծոյ թագաւորեալք,

Ի տիեզերախումբ ատենին զդատողականն ընկալեալ զաթոռ,

Զոր Հոգին՝ կանխագիտութեամբ մարգարէիւք

Զկոչումն ձեր տպաւորեալ ծանոյց

Եւ աւրինակաւք երբեմն յերկրի գուշակեաց։

Թիւք խորհրդականք ըստ վիմաբուղխ աղբերացն ի ժողովուրդն պասքեալ.

Եւ արմաւենիք զուարաճաբոյսք`

Փրկելոցն յեգիպտական գործոյն հովանաւորեալք.

Այսաւր նոյն ինքն յերկնից

Հողմահոլով հնչմամբ ի յանձինս ձեր միացեալ,

Ուստի աղբիւրացեալ յանծայրածաւալ ծովէն,

Ըստ Եդեմական քառավտակ գետոց,

Առաւել եւս խաղացմամբ, ընդ բնաւս ընթացեալ,

Քաղաք Աստուծոյ` զեկեղեցի եւ յարկ Բարձրելոյն հիմնացուցէք,

Ծարաւելոց արբուցիչք եւ ուրախացուցիչք.

Հայցեմք զողորմութիւն առ ի ձէնջ հաւատացելոցս` 

Ի Քրիստոսէ, աղաչեմք։

 

Գերահրաշ բարունակք` յԷէն զարգացեալք եւ ծաղկեալք,

Ուռք պտղալիցք ներգործութեամբ լուսոյն մաքրեալք,

Ննձինք երջանիկք յեռանձնաթիւ միաբուն էացեալք զաւրութիւն.

Լոյս տիեզերաց յիսկակից բանէն`

Կոչեցայք, եւ աղ մաքրութեան.

Աւծմամբ Սուրբ Հոգւոյն աջով հայրական`

Իշխանք ընդ ոլորտս երկրի կարգեցայք.

Աստուածազաւր սաստիւք յանդունդս հերքեալ,

Զմեղսասէր զաւրս խաւարին եւ զտարագրեալ մարդկային բնութիւնս

Ազատեցէք ծննդեամբ վերստին.

Շնորհաւք անճառիւք սքանչելագործեալ Որդիս`

Բարձրելոյն Հաւր նուիրեցէք,

Արեամբ միջնորդիւ սրբոյ Միածնին հրաւիրելով ի փառս անպատումս.

Լուսատուք տիեզերաց եւ պաշտեցեալք ի յերկինս.

Հայցեմք զողորմութիւն առ ի ձէնջ հաւատացելոցս`

Ի Քրիստոսէ, աղաչեմք։

 

Որ արփենից գերունակութեամբ ի վեր` քան զհրաշս,

Փառաց ստեղծողին վեհից հրեղինաց`

Տարրեղէն բնութեամբ անաւթք մաքրագոյնք,

Ի շնորհս ընկալեալք վեհագոյն պատուով,

Յառաքելութիւն կոչմամբն Յիսուսի,

Ինքնախորհող բնաւից Արարչին գոլով ի նորումս խորհրդակիցք.

Սկիզբն Հաւատոյ աճման հրաշափառ նորոյ աշխարհի,

Յերկրորդ Ադամ սերեալ ցեղապետք, ծնունդք եւ զարմք նոր Սիոնի.

Բարեկամք Բարերարին եւ յոյս քաւութեան.

Հայցեմք զողորմութիւն առ ի ձէնջ հաւատացելոցս`

Ի Քրիստոսէ, աղաչեմք։

 

Րաբունք անճառ, լուսոյն ճառագայթք եւ իմաստութեան Էին հե­ծանոցք,

 

Ժիր մշակք եւ որսորդք Հոգեւորք բանական սեռիցս`

Ի զգայական ծովէն ընկալեալք,

Որ զէացուցիչ բնաւից եղելոց եւ զբաղկացուցիչ ի ջուրց կենդանեաց,

Անորոշաբար արուեստակցութեամբ,

Ընդ ձեզ ընկալայք լեզուաւք հրեղինաւք,

Ուստի զաւրացեալք արութեամբ Հոգւոյն,

Ընդ խաղացելոյն զմահ կոխեցէք,

Անչարչարելոյն չարչարակցեցայք.

Բացողք երկնից յարկացն եւ ժառանգք տաւնողացս ձերոց,

Լերուք բարեխաւս եւ առիթ կենաց.

Հայցեմք զողորմութիւն առ ի ձէնջ հաւատացելոցս`

Ի Քրիստոսէ, աղաչեմք։

 

Ի ձայն գոչմամբ աղերս մատուցանեմք քեզ,

Թագաւոր անմահ եւ Տէր կենարար,

Համախմբեալք ի յիշատակի քոյին ընտրեալ սուրբ առաքելոցն,

Որ իբր զլուսաւորս զնոսա երկնակառոյց ընթացմամբ աստեղաւք

Բանիւ եւ հոգւով յերկրի յաւրինեցեր.

Եւ նորոգ զտիեզերս երկնազարդ ստեղծմամբ`

Վերստին պայծառացուցեր.

Սոքաւք զնսեմացեալս յանգիտութիւն`

Յիմանալի լոյս քո փոխադրեցեր,

Որով հայցեմք ի քէն` մի՛շտ բարերար եւ բազումողորմ,

Զաւրհներգուն փառաց մեծի տէրութեանդ`

Զհայրապետն մեր զտէր [այս անուն]

Հանդերձ ընտրեալ սուրբ դիտապետաւք եւ Հոգեպայծառ մեր վարդապետաւք,

Մշտաբորբոք սիրով ամրացո՛ ի խարդախող հաղբից բանսարկուին.

Թագաւորին մերոյ` զաւրութիւն

Ինքնազաւր քոյին աջովդ պարգեւեա՛,

Լինել գործակից ի պատերազմունս` միշտ ի պարծանս քրիստոնէից,

Ի փառս եւ ի գովեստ անուանդ քո, աւրհնեալ յաւիտեանս.

Ահա յիշեսցես եւ ողորմեսցիս ննջեցելոցն` 

Յուսով յարութեան, խնդրեմք։

 

Եւ եւս առաւել

Զյորդորումն սիրոյ եւ զգործս բարեաց պարգեւել մեզ, խնդրեմք։

 

Զանձինս մեր եւ զմիմեանս

Տեառն Աստուծոյ ամենակալի յանձն արասցուք, խնդրեմք։

 

Գովեալ ի վերնոցն հրանիւթից զաւրութեանց

Աստուածապարփակ երկիր լուսածին.

Ճառիւք իմաստնոց եւ ի ստորնայնոցս հրաշաձայն երգով,

Տիրամայր, որ բազմազան տեսութեամբ մարգարէիւք նախկին ծանուցար,

Անխախտելի գոլով կուսութեամբ,

Ընդ որս եւ մեք յառաքելախումբ նուագս տաւնից

Երգաբանութեամբ բարեբանեմք զքեզ, Իսկուհի,

Որ ես միշտ աւրհնեալ`

Ի պարս սրբոց եւ ի յիշատակս մարտիրոսաց,

Զոր եւ բարեխաւս հանդերձ քեւ ունիմք

Առ բարեխնամ փրկողն բնութեանս,

Զի էապէս հպմամբ միասցի միշտ ի ժողովս հաւատացելոց,

Փրկել եւ պահել ի դժրանաց գաղտնի փորձողին

Եւ յերեւելի նեղչաց` պարսպել,

Զի յաւերժ զուարճ տաւնիւ բերկրալից,

Ուղիղ դաւանութեամբ գոչեսցուք` ասելով.

Ողորմեա՛ց մեզ, Տէր Աստուած մեր,

Ըստ մեծի ողորմութեան քում։