Հաւաքմունք ի գրոց պատմագրաց յաղագս գիւտի ժամանակաց անցելոց մինչեւ ի ներկայս

Իսահակ լեալ ամաց Կ. ծնանի զԵսաւ եւ զՅակոբ, յետ Ի. ամի առնելոյ զՌեբեկա, կեցեալ այլ եւս ամս ՃԻ. ընդ բնաւն ՃՁ. ամաց մեռանի: Իսկ Յակովբայ լինին որդիս երկոտասան եւ դուստր մի, ի յերկուց դստերացն Ղաբանայ, ի Լիայէ եւ ի Հռաքելայ, եւ յերկուց աղախնաց նոցա, ի Բաղղայ եւ ի Զեփղայ: Եւ թէպէտ եւ առաջին որդի Ռուբէն էր զոր ծնաւ ի ՁԵ. ամի կենաց նորա, եւ զՇմաւոն ի ՁԶ. ամին, սակայն զՂեւի առնուն ի կարգ զոր ծնաւ ի ՁԷ. ամին, յորմէ ազգէ մեծն Մովսէս, զոր համարին այսպէս Յակովբ ամաց ՁԷ. անց ծնանի զՂեւի` ի Լիայէ կնոջէ իւրմէ. Ղեւի լեալ ամաց ԽԶ ծնանի զԱմրամ: Ամրամ ամաց Հ. ծնանի զՄովսէս: Մովսէս ամաց Ձ. հանէ զժողովուրդն յԵգիպտոսէ: Դարձեալ եւս ըստ Եւսեբեայ ժամանակական կանոնացն, ՂԲ. ամին Յակովբայ լինի նմա որդի Յովսէփ ի Հռաքելայ կնոջէ իւրմէ, եւ յեօթն եւ ի տասն ամին իւրոյ Յովսէփ վաճառի յեղբարցն յԵգիպտոս, եւ լեալ ի տան բանդին ԳԺ. ան ամ, յերեսներորդ ամին տիրէ Եգիպտացւոցն ամս Ձ. կեցեալ ամս ՃԺ. մեռանի: Յառաջին ամին լիութեանն Եգիպտոսի տիրէ Յովսէփ եւ ի Ը. երորդ ամն սկիզբն սովոյն նոցա. եւ յերկրորդում ամի սովոյն իջեալ Յակոբայ յԵգիպտոս ՃԼ. ամաց կեցեալ այլ եւս անդ ԺԷ. ամ վախճանի ՃԽԷ. ամաց` ի ԻԶ. ամին թագաւորութեանն Յովսէփու, որ այլ եւս եկաց Յովսէփ ամս ԾԴ:

Յետ մահուանն Յովսէփու ծառայեն որդիքն Իսրայէլի Եգիպտացւոցն ամս ՃԻԴ. յիջիցն Յակովբայ լինին ամք ՄԺԵ. ի ԿԴ. ամի յԵգիպտոս, ծառայութեանն ծնանի Մովսէս եւ լեալ ամաց Ձ. եւ Ահարոն եղբայր Մովսէսի ՁԳ. հանեն զժողովուրդն յԵգիպտոսէ, եւ Խ. ամ առաջնորդեալ ժողովրդեանն յանապատին, վախճանի Մովսէս ամաց ՃԻ: Իսկ Յեսու որդի Նաւեայ յետ Մովսէսի անցուցեալ զնոսա ընդ Յորդանան` առաջնորդէ յերկիրն աւետեաց ամս ԻԷ. կեցեալ ամս ՃԺ. վախճանի:

Զկնի Յեսուայ դատաւորք դատեցան առաջնորդութեամբ. որոց առաջին`