ԳԼՈՒԽ ՏԱՍՆԵՐՈՐԴ
ՎԱՍՆ ԾԱԾՈՒԿ ՊԱՀԵԼՈՅ ԶԴԱՏԱՍՏԱՆԱԿԱՆ ԳՐԵԱՆՍՆ

1. Դատաստանական գրեանքն պահիլ պարտի ծածկաբար, առանց յայտնելոյ այլոյ ումեք եւ թարց թոյլատրելոյ ընթեռնուլ ումեք. մանաւա'նդ, յորժամ բանքն իցեն ծածուկ` մեծաւ զգաստութեամբ պարտ է պահպանիլ, զի բաց ի դատաստանական գրագրաց ոչ ոք կարասցէ հպիլ ի նոսա եւ ընթեռնուլ:

2. Կարգաւորութիւն դատաստանական մինչեւ ոչ իցեն ստորագրեցեալք ամենայն դատաւորք եւ չիցէ գրեցեալ ի գիրք աւուրց` բնաւ ոչ երբէք պարտ է ցուցանել ինքեանց դատախնդրացն եւ ոչ այլոց ումեք:

3. Եթէ դատաւոր կամ ատենադպիր կամ օրինակօղ զդատաստանական կարգաւորութիւն յառաջ քան զամենայն դատաւորաց ստորագրեցման եւ գրեցեալ գոլոյն ի գիրք աւուրց կամ արքայական ծածուկ հրովարտակսն, որ պարտ իցէ պահիլ ծածկաբար, ցուցանիցէ դատախնդրաց եւ այլոց ումեք, եւ իցէ վասն բարեկամութեան կամ վասն ատելութեան եւ վասն որո'յ եւ իցէ պատճառաց` յորժամ յայտնեսցի եւ քննեալ ստուգեսցի, հրապարակաւ ձաղկեսցի եւ վարեցեալ լիցի ի մետաղս զամենայն կեանս իւր:

4. Ամենայն հրովարտակաց, պրեմեմօրիաց, առզայից, յայտարարութեանց եւ այլ սոցին նմանեաց, նոյնպէս եւ դատաստանական կարգաւորութեանց եւ ամենայն հանգամանաց բանից պարտ է գրել օրինակն, զի յորժամ պիտոյ իցէ ընթեռնուլ եւ վերահասու լինիլ բանից` ոչ միշտ ընթերցցին գնախատիպն, զի մի' մաշեսցի եւ անպիտանասցի, այլ ի ժամանակի հարկաւորութեան օրինակքն ընթերցցեն. եւ եթէ մաշեսցին օրինակքն` կարելի է կրկին գրել օրինակ նորին. եւ այս պարտաւորութիւն ըստ տնօրինելոյ ատենադպրին լրացուցանել պարտին օրինակօղք, եւ յորժամ գրեսցեն օրինակն` պարտին համեմատել ընդ նախատպին, զի եթէ սղալեալ իցեն` սրբագրեսցեն:

5. Ի դատաստանարանի լուծումն եղեալ ամենայն բանքն ամյամէ նախատիպքն եդեալ լիցի ի գրքատուն, որոյ փականս եդեալ լիցի ի յատեան դատաստանի` ի ներքոյ իշխանութեան ատենադպրին, իսկ օրինակք նոցին եդեալ ի յարկղոջ պահեսցի ի սենեկի, ուր նստին օրինակօղք, թարքմանիչք, եւ փականս արկղին պահեսցեն օրինակօղք: