Տարեգիրք

/106ա/ Ի թուին ՇՂԳ [593=1144] էր բրինծ յԱնտիոք Պեմունդն որդի Պեմնդին, որ թէպէտ եւ անձամբ սկայաձեւ էր եւ ուժեղ, այլ ոչ իմաստութեամբ նոյնպէս։ Եւ էր Պաղտինն տէր Քեսնոյ եւ Մարշայ եւ բազում գաւառաց ի սահմանացն Մելիտինոյ մինչեւ ի դուռն Անտիոքայ։ Էր եւ կոմս Ուռհայոյ Ճօսլինն տէր Թլպաշրայ, Հոռոմկլային, Պրին եւ Նզեպին։ Ի ժամանակին յայնմիկ զօրաժողով արար տէրն Խառնայ Զանկի, եւ գտեալ դիպող ժամանակ զի ոչ էր Ճօսլինն անտ, եւ եկեալ բանակեցաւ ի վերայ Ուռհայոյ, կանգնեաց մեքենայս եւ նեղէր զքաղաքն, եւ արք քաղաքին զմիմեանս յորդորելով տային պատերազմ ընդ նմա, եւ ոչինչ կարէին առնել քաղաքին։ Ապա այլ իմն խորհուրդ չար առեալ փորէին զհիմն պարսպին խորագոյն, եւ հանեալ զքարն եւ սոյն եդեալ ի տեղին, եւ արարին բազում տեղիս այսպէս եւ լցին զփորուածսն փայտիւ, եւ զարկեալ կրակ /106բ/ բորբոքեցին զփայտն եւ այրեալ փլաւ պարիսպն, եւ առ հասարակ դիմեցին ի քաղաքն, եւ քաղաքացիքն անդ ժողովեալ յետս պահէին զնոսա. եւ նոցա գնացեալ գաղտ ի միւս այլ կողմ ելին ընդ պարիսպն եւ մտին ի քաղաքն, եւ սուր ի վերայ եդեալ կոտորէին. եւ լուեալ զաղաղակն ի բաց թողեալ զփլեալ պարիսպն եւ ամենեքեան առհասարակ մտին ի քաղաքն, եւ քաղաքացիքն փախեան դէպ ի կլայն։ Իսկ անօրէն կլայպանն փակեաց զդուռն եւ ոչ ետ թոյլ ումեք մտանել ի կլայն, եւ անօրէնքն սուր ի վերայ եդեալ յանխնայ կոտորէին, զոր ոչ կարէ լեզու պատմել զդառնութիւն աւուրն զոր եկն ի վերայ Ուռհայոյ, որ եւ սուրբ հայրապետն Ներսէս ողբս ողորմագինս գրեաց վասն դառնութեանն՝ զոր կրեաց Ուռհա ի Գ օրն ի սեպտեմբեր ամսոյ, յաւուր շաբաթու։