Տարեգիրք

Ի թուին ՉԺԸ [718=1269] եղեւ շարժ սաստիկ եւ յաշխարհին Կիլիկիա ի տեղիս տեղիս բազում շէնս յաւեր դարձոյց, եւս առաւել առ լերամբն որ Սեաւ կոչի. եւ զանառիկ դղեակն Սարվ/177բ/անդաւ յաւեր դարձոյց, եւ զբնակիչսն առ հասարակ մահացոյց եւ ի սուրբ ուխտն Արքակաղնին քահանայսս եւ կրօնաւորսս վախճանեցան ի տանցն ընկղմելոց, եւ ընդ լեռնակողմն ընդ այն բազում շէնս եւ զբերդն Դեղնքարն, եւ այլ բազում տեղիս խարխալեալ հերձեաց։ Ի սոյն ամի պարոնն Հայոց Լեւոն, գնաց յարեւելս առ խանն Ապաղա, եւ նա ընկալաւ զնա մեծարանօք, եւ բազում պարգեւօք դարձոյց յաշխարհն իւր Կիլիկիա։ Յայսմ ամի որդի սպարապետին Հայոց Հեթում փոխեցաւ ի կենցաղոյս ի յուլիս ամսոյ ԺԵ-ն եւ թաղեցաւ ի սուրբ ուխտն Մլիճի։ Եւ դարձեալ ի սոյն ամի ի սեպտեմբեր ամսոյ ԻԹ-ն հանգեաւ ի Քրիստոս միւս այլ որդին Սմբատայ սպարապետին՝ Վասիլ, ի Տարսոն, եւ թաղեցաւ ի սուրբ ուխտն Մլիճի, որում ողորմեսցի Տէր։ Ի սոյն ամի յամսեանն հոկտեմբերի որ օր ԻԹ էր, յԳ-շաբթի ի մտանել արեգականն, թագաւորն Հայոց Հեթում փոխեցաւ ի /178ա/ կենցաղոյս, եւ յաւելաւ առ հարս իւր առ ստորոտով Բարձրբերդոյ ի գեօղն որ կոչի Ակներ, եւ բարձեալ տարան զնա ի սուրբ ուխտն Դրազարկն, եւ անդ թաղեցին առ դամբարան սուրբ հայրապետին Գրիգորի… որ եւ ի ժամ վախճանին բարիոք խոստովանութեամբ կրօնաւորեցաւ եւ անուանեցաւ Մակար։