Տաղեր

Իշխանին` դիւաց բանսարկուին,
Ո'չ գիտեմ զինչ արարի.
Անցաւոր, պատրիչ աշխարհիս,
Ո'չ գիտեմ զինչ արարի:
Քմակից եղեալ ընդ մարմնոյս,
Սոքօք մեղըս արարի,
Այս երիս անհաշտ թշնամեաց,
Ո'չ գիտեմ զինչ արարի:

Սուտ եղբարց, Կայէն ընկերաց,
Սուտակասպաս յարակցաց,
Հաւանեալ ծաղու երեսաց,
Ետու զմիտս ի կամաց,
Նենգութեամբ արկին զիս յորսայս
Նախատանաց, բասրանաց,
Անիրաւ այսպէս շոգմոգաց,
Ո'չ գիտեմ զինչ արարի:

Ո՞ւր են խօսք բախտից եւ հարկաց,
Ճակատագրաց, թալէհաց,
Ընդէ՞ր ո'չ ընտրեն զարժանին
Ի յանարժան կախարդաց:
Բնաւին չեթող ի ձեռաց
Օր մի հանգիստ ի վշտաց,
Ֆէլէկին անհարթ պատահմանց,
Ո'չ գիտեմ զինչ արարի:

Ւիւսեցեալ ի շարս կարգաց,
Մի զմիով հետակաց.
Այլազգեաց եւ մերթ մեր ազնեաց,
Տալով զիս ձեռք ի ձեռաց,
Արծաթի, ոսկւոյ եւ գանձաց
Տէր ասելով հռչակաց,
Անհամար զայս գանձ մթերած,
Ո'չ գիտեմ զինչ արարի:

Քենապահ ոսոխ մատնչաց,
Մերձաւորաց նախանձանաց,
Տնաքանդ եղեալ ի տեղաց
Վտարեցայ հեռացած:
Տիրանենգ Յուդայ նմանած,
Անյագ գազան կատաղած,
Ուրացող պղծոյն անիծած,
Ո'չ գիտեմ զինչ արարի:

Ի յօտար երկրի դէմս ելաց,
Չքաւորաց, պարտատէրաց,
Ռզակ եւ մալն կորուսած,
Հին տէֆտէրաց կարօտած,
Զիմ չառած պարտքն չտեսած,
Զիա՞րդ խնդրես, անաստուած,
Իսնաֆսըզ մարդոց թէլպիսաց,
Ո'չ գիտեմ զինչ արարի:

Առաքեալ զօրօք ըմբռնեած,
Մերկիկ եւ բոկիկ, գլխիբաց,
Կապանօք ոտից եւ ձեռաց,
Երես ի քարշ է տարած,
Վեց ամիս ի բանտի արգիլած,
Եկ զայս ծանր բեռն բարձ,
Քրդաստան երկրի պարոնաց
Ո'չ գիտեմ զինչ արարի:

Սոսկացեալ դողամ ի պարտեաց,
Թէ յիմ լիցին վճարած,
Սղութիւնք հացից յաճախած,
Վարձք եւ վաճառք սպառած,
Մատնութիւնք միմեանց յոլոված,
Մինչ զի եւ մէք տուգանած,
Մխիկ եւ Մարգար սեւագլխաց
Ո'չ գիտեմ զինչ արարի:

Էղկելի կենօք տառապած,
Ի քեզ, Տէր իմ, յուսացած,
Ճար արա գերւոյս պաշարած,
Զի յամենից եմ զրկուած,
Սխրալի եղբարք իմ գոված,
Աղօթեցէք առ աստուած,
Այս տարւոյ ՊԷԼԱՅ թւինաց
Ո'չ գիտեմ զինչ արարի: