Տաղեր

Իսկապէս բարերար զքեզ, Տէր, ունիմ,
Բաց ի քէն բարերար, զայլ ոք ոչ ունիմ,
Ի սնոտեաց, սուտ իրաց ես ինչ ոչ ունիմ.
Բաց ի քէն բարեկամ զայլ ոք ոչ ունիմ:

Սատանայ եւ զդեւս ինձ պատրիչ ունիմ,
Սուտ աշխարհս խաբեբայ, յորդորիչ ունիմ,
Զմարմինս հակառակ, թշնամի ունիմ.
Բաց ի քէն բարեկամ զայլ ոք ոչ ունիմ:

Որդիք իմ եւ եղբարք` յորս ապաւինիմ,
Ազգականք, մերձաւորք` առ որս յոյս ունիմ,
Բնաւին յումեքէ օգնութիւն չունիմ.
Բաց ի քէն բարեկամ զայլ ոք ոչ ունիմ:

Ւիւթական ինչ իրօք յորս մեծամտիմ,
Թէ' ոսկի, թէ' արծաթ, թէ' մեղք զոր ունիմ,
Համայն սուտ եւ չնչին, մերկանալ ունիմ.
Բաց ի քէն բարեկամ զայլ ոք ոչ ունիմ:

Քանզի փառք եւ պատիւ զոր արդէն ունիմ,
Հոգեւոր, մարմնաւոր, որով եւ պարծիմ,
Ակամայ ի բնաւից հրաժեշտ ունիմ.
Բաց ի քէն բարեկամ զայլ ոք ոչ ունիմ:

Ի սոսա վարանեալ տարակոյս ունիմ,
Թէ վերջին օր մահու զիա՞րդ լինիցիմ,
Մի գուցէ անթոշակ յանկարծ մեռանիմ.
Բաց ի քէն բարեկամ զայլ ոք ոչ ունիմ:

Աղքատիկ եւ մերկիկ, սրբութիւն չունիմ,
Ի վարուց պարկեշտից ծածկոյթ մի չունիմ,
Մեղօք լի, չարեօք հօծ, բարի գործ չունիմ.
Բաց ի քէն բարեկամ զայլ ոք ոչ ունիմ:

Սխրալի մահուանէն ահ, երկիւղ ունիմ,
Յորժամ գայ հիւրն յուղոյն գիշերն ի տուն իմ,
Պակասեալ գտանի նկանակ հացն իմ.
Բաց ի քէն բարեկամ զայլ ոք ոչ ունիմ:

Է' կեանք իմ ողբալի խղճիւ, զոր ունիմ,
ՄԻՋԻԴ Է թիւ տարւոյս, զոր հասեալ ունիմ,
Արդ առ քեզ պաղատիմ, Տէր եւ աստուած իմ.
Բաց ի քէն բարեկամ զայլ ոք ոչ ունիմ: