Տաղեր

Քրիստոս, որդի Աստուծոյ,
Փրկեա զհոգիս ի հրոյ,
Ինձ բարի ճանփեկ ցցու.
Աստուած, քաւեա զբազմամեղս:

Մարմինս է խիստ ծուլացեր,
Հոգուս ճարակ չէ արեր,
Ինքն իւր միտքն անմահացեր.
Աստուած, քաւեա զբազմամեղս:

Ճանփաս է նեղ ու հեռու,
Խնդիրք ունին ինձ գալու,
Զհոգիս յինէն առնելու.
Աստուած, քաւեա զբազմամեղս:

Մեղօքս եմ խիստ անճրկեր,
Զհոգիս եմ սեւացուցեր,
Ստեղծողն է ինձ բարկացեր.
Աստուած, քաւեա զբազմամեղս:

Մեղացն ինձ ճարակ կենայ,
Զօրն մեղայ ասէ նա,
ՅԱստուածածինն յուսանա.
Աստուած, քաւեա զբազմամեղս:

Մեղք եմ գործեր անզղջայ,
Օր մի չասի, թէ մեղայ,
Անտէնն ինձի դէմ տի գայ.
Աստուած, քաւեա զբազմամեղս:

Աչքս ի յարատ հայեր է,
Լեզուս սուտ վկայեր է,
Իմ Տէրն ինձ բարկացեր է.
Աստուած, քաւեա զբազմամեղս:

Բերանս պաք կերեր է,
Պատուիրանէն ելեր է,
Անշահ յիշոցք տւեր է.
Աստուած, քաւեա զբազմամեղս:

Մեղօք ի լի է հոգիս,
Օր մի չասի, թէ` վա՛յ զիս,
Ամէնքդ եկէք լացէք զիս.
Աստուած, քաւեա զբազմամեղս:

Տարին տասերկու ամիս,
Անհոգ կացի յաշխարհիս,
Չյիշեցի զօր վախճանիս.
Աստուած, քաւեա զբազմամեղս:

Զմարմինս ի հողոյ ստեղծեց,
Հոգով, մտօք զարդարեց,
Բարի գործել հրամայեց.
Աստուած, քաւեա զբազմամեղս:

Աստուածածին Մարիամ
Տուր ինձ բարբառ ու բերան,
Ապաշխարեմ եւ զիս լամ.
Աստուած, քաւեա զբազմամեղս:

Մեղօքս ես ի շուրջ կու գամ,
Գիշեր ու ցորեկ կու լամ,
Վախեմ թէ անզեղջ մնամ.
Աստուած, քաւեա զբազմամեղս:

Աստուածային բնակարան,
Եկեղեցի աննման,
Մեղաւորաց քաւարան.
Աստուած, քաւեա զբազմամեղս:

Հոգիս ու մարմինս եղբայր,
Մարմինս չարաւ հոգուս ճար,
Անտէնն է անզենահար.
Աստուած, քաւեա զբազմամեղս:

Մեղք եմ գործեր անզղջայ,
Յանտէնէն խապար կու գայ,
Մեղաւորաց վայ կու տայ.
Աստուած, քաւեա զբազմամեղս:

Մեղք եմ գործեր դիժար ես,
Իմ Տէր, մեղայ կասեմ քեզ,
Մեղաւոր եմ, սեւերես.
Աստուած, քաւեա զբազմամեղս:

Մեղօք զհոգիս կու տանջես,
Մեղաւորիս չի լսես,
Յոյս ՚ւ ապաւենս դու ես.
Աստուած, քաւեա զբազմամեղս:

Խոստովանիմ քահանին,
Հաւատամ զՀայրն եւ զՈրդին,
Պաշտեմ սուրբ զԵրրորդութիւն.
Աստուած, քաւեա զբազմամեղս:

Ես մեղաց զաւակ էի,
Մեղօք զհոգիս կորուսի,
Հասաւ օրս վախճանի.
Աստուած, քաւեա զբազմամեղս:

Այսինչ բան էր որ արի,
Ողորմութիւն այլ չարի,
Զաղքատն ի տուն չի թողի
Աստուած, քաւեա զբազմամեղս:

Թաթոսն լայ ողբալի,
Վերայ իւր մեղացն, որ ունի,
Տէրն ողորմած ամէնի,
Աստուած, քաւեա զբազմամեղս: