Գիրք վաստակոց

Եթէ առնես զիւր ձիթին տուրտինն եւ խառնես 'ի ջուր, եւ բանաս զտակն եւ արբուցանես, շատ օգտէ. եւ բակլայի աղբն օգտէ. եւ թէ սպիտակ հող եւ կու շաղախ առնես, եւ գետի խօզ չոր 'ի ներք խառնես եւ 'ի տակսն ածես, օգտէ. եւ թէ մարդոյ հնացեալ գոզ ածես՝ զամէն արժենայ: Եւ զորն ածես 'ի սոցանէ՝ մենակ զտակսն ծածկեա, եւ զհողն ընդ բազուկն 'ի վեր ած եւ կուտեա, եւ զջրելն մի՛ մոռանար, քանի կարես ջրեա: Եւ թէ ուզես որ շատ բեր առնէ, զայս դեղս արա. չափեա 'ի տակէն 'ի վեր զբազուկն երկու թիզ, եւ գայլիկոնով կամ դրով ծակեա՝ 'ի հիւսիսոյ դեհէն 'ի հարաւ թափնթափ. եւ ա՛ռ 'ի լաւ եւ 'ի բերուիկ ծառոց՝ որ իւր պտուղն 'ի նման լինի՝ երկու վարոց. եւ զմէկն 'ի ծակուն մէկ դեհն ած, եւ զմէկայլն 'ի միւս դեհն, զերդ կօշկարի չուան. եւ այնպէս քարշեա, որ այն անտի գայ եւ այն անկից, եւ զծակն վռով պինտ լնուս, եւ ապա խծուծ յերկու դեհէն կտրեա, եւ սպիտակ յարդալի շաղախով ծեփեա զծակտին. եւ զվարոցիդ զերկուսն եւս 'ի մէկ ծառէ ա՛ռ, զմէկ վարոցն 'ի հիւսիսոյ դեհէն, եւ զմիւսն 'ի հարաւոյ:

Եւ ծառ որ շատ տերեւ բերէ եւ քչիկ պտուղ, 'ի բնատակն՝ որպէս յառաջն գրեցաք՝ ցից զարկ, կամ ճեղքեա եւ վար դիր: Եւ թէ զծաղիկն թափէ, կամ շատ բեր առնու եւ չհասուցանէ, դեղն այս է. փորեա բոլոր՝ որ տակն բացվի. եւ 'ի վերայ բուն հաստ տակին երկու քթոց ջրախոտ եւ խոզի աղբ ա՛ծ, եւ 'ի մանր տակսն ա՛յլ պակաս. եւ զիւր ձիթի տուրտինն՝ ջրխառնած 'ի տակսն ա՛ծ, եւ արբո. եւ թէ ջրի աղբն չլինի եւ զտուրտինդ ածես՝ հերիք է: Եւ այն պատահարին որ 'ի հողմոյ գայ, կամ ճիճւոյ՝ որ զտակսն ուտէ եւ վատուժացուցանէ, զդեղերն եւ զամենայն խրատսն զոր վասն այգեաց գրեալ եմք, զայն արա, նա օգտէ: Եւ քան զամէնն լաւ փորձով մկնասոխն է, որ զտակքն բանաս եւ 'ի շուրջն շարես եւ ծածկես: