Գիրք վաստակոց

'Ի ծնունդքն զաղտքն մի՛ քարշեր կամ սրբեր, որպէս զայլ կենդանւոյ. եւ մի՛ 'ի քուռակն մօտիր, զի այն անբան կենդանի չկայ որ զիւր բերքն սիրէ՝ զերդ զձին. եւ երբ մօտի ոք՝ մայրն աղէկտուր լինի. ապա յինքն թող, եւ զքիթն միայն սրբեա յաղտիցն: Եւ յետ ԺԵ աւուրն հետ մօրն յարօտ արա եւ 'ի կեր՝ զքուռակն: Եւ երբ վեց ամիս լրացուցանէ քուռակն՝ գարէձաւար տուր, եւ 'ի մօրն ծծէն մի կտրեր՝ մինչեւ երկու տարին լրացուցանէ: Եւ թէ ղորդ իրաւունք ուզես, եւ զխաս տաճիկ ձիոցն սահմանն, նա այս է. որ քանի քուռակն 'ի ծիծն կենայ՝ զինքն չվազցնես. զի վնաս է քուռակացն. եւ լաւ՝ մէկ աղէկ ունենաս, քան երկու վատ: Եւ թէ արտորաս՝ նա տարի ընդ մէջ վազեցո: Եւ զքո քուռակին ծառայութիւնն սրբելով եւ դարմանելով եւ արութեամբ, իբր քոյ տղային ծառայեա, զի զայն ախորժայ. եւ ստէպ 'ի ծովու ջուր, եւ թէ ոչ՝ 'ի տաք ջուր լուանալ պիտի, եւ սրբել 'ի յոջլէ եւ 'ի տզէ, եւ յայլ կերչաց: Եւ ա՛ռ փոթոթ գինի, եւ հոռոմ ձէթ. եւ երբ լուանաս՝ օ՛ծ զագետակն եւ զբաշն. եւ յամէն աշուն եւ 'ի գարունն, յայս վեց ամիսս սիսռան եւ քուշնայի ալիւրով լուա՛ զքուռակն, եւ յամառն՝ գարէ ալիւրով եւ տղտի ջրով եւ մածնով, եւ վարդեղով, եւ մանուշակի եւ դդմի ձիթով օ՛ծ զագին եւ զբաշն: Եւ երբ տարւոյ լինի՝ յաչսն սրբեա՛ անհնար: