Գիրք վաստակոց

Ծփեա զձին տաք ջրով. եւ թէ բաղանիք ուրդի՝ այլ աղէկ. եւ ա՛ռ մուռ հինգ տրամ, եւ հին անոյշ գինի կէս կուժ, եւ հոռոմ ձէթ կէս նուկի, եւ արա երեք բաժին. եւ զամէնն բաժինն ընդ բերանն կամ ընդ քթափողքն խմցո: Եւ տաք ջրով, եւ թէ ծովու լինի լաւն այն է, ծփեա զփորն աղէկ. եւ թէ հապալաս դնես եւ դաղձն 'ի ջուրն, եւ եփես եւ ծփես՝ օգտէ: Եւ թէ զլեղին մանր ծեծես եւ ճատէ, եւ խառնես 'ի գինին. եւ տաս որ խմէ՝ օգտէ: Եւ թէ նռան կեղեւ լեսած 'ի ջուրն խառնես տաք եւ տաք՝ օգտէ: Եւ քէրէֆսի ունդն եւ կօդային՝ լեսած՝ եւ գինեաւ եւ մեղրով տաս, օգտէ: Եւ թէ հալհամիճէ լեսես եւ գինեաւ տաս, օգտէ: Եւ թէ ոլորտի ձին, հոռոմ ձէթ արա որպէս մարդոյ, նոյն դեղերովն՝ օգտէ: Բայց 'ի վեր քան զամէնն, այս է. տես որ յաչքն չունենայ, եւ թէ լինի հա՛ն. եւ երբ հանես՝ դեռ նեղէ զինքն, ա՛ռ անոյշ գինի կէս լիտր, եւ ա՛րկ 'ի ներքս սեւ քաղցր չամիչ, եւ եփեա որ տրորի, եւ մազով քամեա եւ ա՛ռ զջուրն եւ ա՛րկ 'ի ջուրդ կղմուխ լեսած երկու դրգալ. եւ ընդ բերանն 'ի վայր ա՛ծ տաք, այնպէս որ չայրէ. եւ զպորտն տապակ խարեա. եւ զհոռոմ դեղն անհնար առաջնատուր արա, եւ յօծ թող. զի այսր վերեւ այլ դեղ չկայ բնաւ: