Գիրք վաստակոց

Գիտացիր որ կանուխն լաւ է եւ 'ի խորու գետինն, երբ մէկ անձրեւ գայ: Առաւել եւս յայս հաւանեցան փորձականքն, որ պարտ է զցանն մենակ յաշունն սկսանիլ, եւ յամէն երեք ամիս ձմեռն ցանել. բայց 'ի պաղ տեղիքն պարտ է զցանն 'ի մարտի քսանուհինգէն 'ի վեր սկսանիլ՝ մինչեւ 'ի մէջ գարնանն: Եւ ոմանք զցանուն սահմանն այսպէս արարին. զգարին 'ի մէջ աշնան ցանեցին, որ է 'ի հոկտեմբերի ԻԶ օրն. եւ սկսանին 'ի ցանել զցորեանն 'ի նոյեմբերի ԻԱ օրն: Եւ վկայէ Աստղալիոսի որդին, որ երբ շրջի ձմեռն որ լինի 'ի ԻԴ օրն դեկտեմբեր ամսոյ, նա այլ չցանեն: Եւ Դիմոկրատէս յիշեալ է զիր մի՝ զոր ինքն է փորձեալ, թէ զցորեանն եւ զգարին 'ի յանկանիլն Ֆաքհայ աստղին պարտ է ցանել. 'ի յայն ժամն անձրեւք բազումք են, ան կրկնի գետինն սերման, եւ այժմու ցանածն բերէ զտասնեակն, եւ հատն գէր լինի: Եւ է անկումն Ֆաքհայ աստղիս՝ 'ի նոյեմբերի ԻԶ օրն: Որ ցանել կամի՝ զամսոյս քանիքն պինտ կալցի 'ի յուշի, զի բազումք ոչ ճանաչեն զաստղն: Եւ ամենեւին չէ պարտ 'ի պարխրցնոցն 'ի չորութեան ժամանակն սերմն ձգել. զի երբ գետինն 'ի չորութենէն կծկեալ լինի եւ յիրար եկեալ, նա ե՞րբ բուսուցանէ զսերմն: Յորժամ սերմն յամէ 'ի հողն, նա կամ աւիրի կամ ուտուի, եւ այսու բոյսն սղալ գայ եւ վատ. ապա պարտ է որ այլ գիջային օդերով՝ ցանուի հիւթով, որ սերմն անսղալ շուտ եւ լաւ ելանէ: Եւս առաւել թէ 'ի ջեր օր լինի, զի գետնին արգանտն բաց լինի եւ ընդունակ, որպէս յառաջ ասացաք: Եւ այսու՝ սերման ուժով եւ հաստ տակռիչ եւ կոճակ առնու, եւ զհատն գէր բերէ: Եւ այլք ոմանք հաւանեալ են, որ զսերմն 'ի լուսնին լիութեան պարտ է ցանել, չորս աւուրն 'ի վեր որ նոր է, մինչեւ ԺԵ աւուր լինի, որ է լրումն լուսնին. եւ այս է արդիւնաւոր ցան: Եւ այլք ասացին, թէ պարտ է համբերութեամբ զսերմն 'ի հինգ անգամ ցանել հետ 'ի հետ. վասն այսորիկ որ բոյսն եւ հասկն եւ ժողովելն՝ հետ 'ի հետ լինի, որ լաւ 'ի շահ գայ:

Այծու աղբով թրջէ զցորեանն գիշեր մի, եւ ցանեա, արդիւնաւոր լինի: