Գիրք վաստակոց

Պարտ է զնոր տունկն լաւ ստածել եւ զաւելի երկայնութիւնն կտրել 'ի հետ. եւ տես՝ որ մօտ 'ի յակն չկտրես. արձակ կտրեա երեք մատն 'ի յակնէն: Եւ զկտրուքն ընդդէմ հարաւոյ արա. եւ թէ 'ի շարժն՝ 'ի յակին 'ի դեհն որ չիջանէ ջուրն եւ աւիրէ զակն: Եւ պարտ է պտղի ձիթի տուրտին ունել 'ի հետ, եւ զկատարսն օծանել, այլ բնաւ ջուր չերթայ: Եւ թէ յոջլէ վախես՝ զտիպխն զոր 'ի կաղնոյն ճագմընէն շինես, ներքեւ ակինն ընդ ուռն փաթաթ անցո՛, որ ոջիլն 'ի վեր չգայ: Եւ երբ երեք տարւոյ լինի՝ հատ եւ սրբեա զակնուռսն եւ զաւելի ճիւղսն, եւ զչափաւորն մէն թող. եւ աղէկ խորու ակնբցէ՛ ոտն խորու, եւ զփոսն աղէկ նեխած աղբով լից եւ զհողն 'ի վերայ բեր, եւ յաշունն արա զայս: Ապա թէ 'ի մէջ եւ 'ի ջրընկէց գետին լինի այգին, նա չէ պարտ ակնբցել, զի ջուրն աւերէ զտունկն: