Գիրք վաստակոց

Եւ իւր նշանն այս է, որ կարմիր դառնան այգւոյն տունկն եւ տերեւն, կամ ամէնն կամ բակ բակ: Եւ իւր դեղն այս է. ծածկեա զտնկերն եւ կաղնի փայտ սրեա եւ խաչք անցո՛ եւ հողովն ծածկեա, մինչեւ 'ի վերայ կաղնի փայտին անցանէ՝ բժշկի այգին: Եւ ոմանք ծովու ջուր խմեցուցանեն տնկին. եւ այլ ոմանք զպտղի ձէթն եւ զգինին յիրար խառնեն եւ օծանեն զտունկն: Եւ Պօլօնացիք փորձեալ են, որ երբ այգին այնպէս նեղ լինի, նա գամ մի խաչք անցուցանեն, լաւանայ: Եւ այլք գոզ արկանեն 'ի վերայ: