Գիրք վաստակոց

Առ զհոռոմ ձիթի տուրտինն կամ զձէթն, եւ շողցո, եւ զպախրէի լեղին 'ի ներս խառնեա եւ օ՛ծ զտեղին, ուր քսվիսն լինի, եւ սպառի: Եւ թէ առնու ոք արջասպ եւ քացախ եւ յիրեար խառնէ, եւ օծանէ, զտեղին ուր լինին՝ իսպառ սատակին: Եւ եթէ ոք առնու զխիարկին արմատն եւ եփէ ջրով, եւ լուանայ զտեղն՝ սպառէ զամէն: Եւ թէ առնու ոք զնոր սապոնն, որ դեռ կենայ եւ եփի, եւ օծանէ զտեղին, սպառէ զքսվիսն, եւ սրբէ որ այլ չլինի: Եւ թէ ուզես որ տախտ շինես եւ քսվիսն բնաւ չբնակի 'ի յինքն, ա՛ռ զտզրուկն որ 'ի մարդ փակուցած լինի, եւ թափեա զարիւնն 'ի փորոյն, եւ օծ զտախտն կամ զտեղն, զոր կարծես քսվիս բնակիլ անդ, նա այլ բնաւ չլինի: Եւ թէ ոք առնու աման մի ջուր լականով եւ դնէ ներքեւ տախտին, եւ 'ի վերայ այն ջրին ելեալ պառկի, քսվիսն զինքն չուտէ: Եւ թէ զհասարակաց հեշտ դեղն առնէ ոք եւ եռջրէ, նա սպառէ զինքն, ապա կրկին լինի: Զծաղիկն ընկզին չորացո՛ եւ ծխեա, փախչին քսվիսքն: