Գիրք վաստակոց

Ծխեա զձիւթն, եւ տե՛ս. թէ ծուխն թանձր է՝ աղէկ է եւ ուժով, եւ թէ նօսր՝ վատ է, չէ 'ի բան: Եւ թէ ուզես որ լաւանայ, 'ի քարէ պուտուկ մի ա՛ծ, եւ յարեւն կրակ վառեա, եւ մեղմ հալեա, եւ հօտի մոխրաջուր արա, եւ 'ի ներք խառնեա. եւ եփեա աղէկ. եւ զայն ջուրն երեք հետ փոխեա երեք օր, յամէն օր երեք հետ, որ լաւանայ եւ ապա զջուրն սպունգով քաղեա, եւ 'ի բան տար: Եւ թէ ձիւթն լեղի լինի՝ պինտ հալեա եւ անոյշ գինի լից 'ի վերայ եւ եփեա, լաւանայ. եւ թէ կակուղ լինի ձիւթն՝ երեք հետ պարտ է եփել որ պնտի, եւ ապա 'ի բան տանել: Եւ են ոմանք որք հօտի մոխիր խառնեն եւ եփեն. եւ են որք մոմ, եւ հօտի մոխիր եւ հին գինի: Եւ այլք զմոմն եւ զձիւթն հաւասար առնեն, եւ հալեն եւ ձիւթեն:

Գրեալ են, թէ խիստ աղէկ ձիւթն 'ի Սարոյ երկրէն գայ. եւ թէ ուզես որ գինին պինտ լինի, զմոմն աւելի արա քան զձիւթն: Սակայն հինքն ամենայնքն սպիգովեալ են զմոմն, զի փոթոթէ զգինին եւ շոյտ քացախեցուցանէ. եւ 'ի հնոցն հաստատեալ եմք փորձով, որ մենակ ձիւթն լաւ է: Եւ աղէկ ձիւթն յ'Ռապօս երկրէն գայ եւ յ'Ռօտիայ կղզւոյն: Եւ մեք առ հասարակ լաւ ձիւթ զայն համարեցաք՝ որ յիստակ եւ սպրկիկ լինի: