Հայ Մամուլի Մատենագիտական Գործեր

ՆՈՐ ՍԵՐՆԴԱԿԱՆՆԵՐ

Բագարատ շարժման հիմնադիրներուն եւ յարողներուն թիւը կու տայ 40, [1] առանց անուններ նշելու: Կոմս կու տայ որոշ անուններ: Կը մէջբերենք, «Նոր-սերնդական շարժման հիմը դրին երկու միջնակարգ դպրոցներէն ելած խումբ մը նորահաս տղաներ՝ Հմայեակ Խոռոզեան-Մանուկեանը (խմբագիր). Մանուէլ եւ Բարունակ Կապուտիկեանները. Գալուստ Էյնաթեանը. Արամ Սաֆրաստեանը. Խոսրով Խանճեանը եւ աւելի կրտսերները՝ Ներսէս Պասեան. Պարգեւ Պանիրեան. Մանուկ Ասլանեան. Տիգրան Ջրբաշեան. Արտաշէս Հացագործեան-Վանարեան եւ քանի մը այլ պատանիներ»։ [2]

Քանի մը այլ պատանիները անուղղակիօրէն կ՚ամբողջացնէ Խ. Թիւթիւնճեան. երբ կը նշէ Երամեան վարժարանին մէջ շարժման հետեւորդներուն անուններէն ոմանք – Զաւէն Կորկոտեան. Տիգրան Մանդակունեան. Արսէն Թէրլէմէզեան. Տաճատ Թէրլէմէզեան [դաւաճան Դաւոյի ահաբեկիչը. Ա, Տ, Խ, ]. Միհրան եւայլն։ [3]

Խ. Թիւթիւնճեան Խոսրով Խանջեանի մահագրականին մէջ (յօդուածը անստորագիր է. սակայն շատ հաւանաբար իր գրիչին կը պատկանի). կը նշէ նոր անուններ — Արփիար Սաֆրաստեան. Արշաւիր Գազանճեան. Հրանդ Բագրունի. Տէրտրանց Վահան եւ Տիգրան Թորգոմցեան։ [4]

Հայկակ Կոսոյեան Ներսէս Պասեանի մահագրականին մէջ. նոր սերնդական երէցներուն կարգին կը նշէ Վահան Արտամետցեանը. իսկ կրտսերներու կարգին՝ Օննիկ Մխիթարեանը եւ Արշաւիր Գազանճեանը։ [5]

Կոմս հիմնադիրները միջնակարգ երկու դպրոցներէն [Հայկազեան - Կեդրոնական եւ Երամեան] խումբ մը նորահաս տղաներ կը նշէ: Ըստ Տիգրան Բրուտեանի. «մեծ մասամբ Երամեանի աշակերտներ»։ [6] Ճիշդ չեն այս հաստատումները: Հիմնադիրներուն մեծ մասը եւ կորիզը կու գայ Կեդրոնական վարժարանէն: Խ. Թիւթիւնճեան երկու առիթով կը նշէ հիմնադիրներուն յաճախած վարժարանը. որ Կեդրոնականն է։ [7] Հ. Երամեանն ալ Կեդրոնականի շրջանաւարտ աշակերտներուն կը վերագրէ թերթին խմբագրումը (ինչպէս տեսանք):