Գիրք վաստակոց

Աստանօր արժան համարեցաք զառաջակայիցն զերկարաբանութեանցն զանց առնել, եւ համառօտաբար զպիտանացուն ժողովել աստ, եւ յիշումն առնել զկնի շարագրելի աստիճանացն՝ որք 'ի յառաջիկայ դրունսն շարակարգեսցին. եւս առաւել զայնմանէ որ պիտացու է գեղջին, որ իւր տէրն ստէպ հայի 'ի յինքն, եւ կառկուռ երթայ տեսանէ եւ պէտ առնէ. եւ այնու կարէ իմանալ զգանկատն եւ զցաւն տեղւոյն, եւ փութով բժշկէ եւ արիացընէ զնոսա յաղագս շինութեան, եւ քաջալերէ զնոսա յամենայն պէտս շինմանցն: Եւ եթէ ուրուք պատճառանօք վերջացեալք գտանին 'ի գործս վաստակոց իւրեանց՝ նա յիշելումն առնէ, եւ քաջալերէ զնոսա իշխանական հրամանաւն 'ի գործն. վասն զի յորժամ զգովելին գովէ եւ զպարսաւելին պարսաւէ՝ նա միամտանան 'ի բանն, ըստ իւրաքանչիւր կերպի, եւ յորդորին ցանկութեամբն 'ի գործ վաստակոց: