Գիրք վաստակոց

Յիւրաքանչիւր ժամանակ եւ 'ի մարդկային հասակն՝ ումեք որ հետեւին երկրագործութեան, ամենայնիւ առաւելութեամբ ազնիւ է տղայական եւ մանկութեան հասակն: Եւ պարտ է նոցա ծառայապէս կալ այնոցիկ՝ որք հմտացեալք լինին գործոյն եւ հասեալ 'ի ժամանակս ծերութեան. վասն զի անյոյլաբար խլեն 'ի գիտնոյն զամենայն փշաբեր եւ զանտառախիտ բանջարսն եւ զծառսն, եւ սրբիչք են ճանապարհաց անդեացն եւ վաստակոցն, եւ անխոնջ փորեն, պեղեն, քաղհնեն, ստածեն, նաեւ ժողովեն, խրտեցնեն զվնասակար ձագսն, եւ վարեն զանասունս յանդեացն: Եւ յայս ամենայն վերոյ գրեալ գործս՝ տղայքն առաւելագոյնք են քան զմիջահասակ մանկտիսն. վասն զի անյոյլաբար ցածանան եւ վերանան, եւ հեշտագոյն է նոցա քան մեծամեծացն. եւ որպէս 'ի խաղ ընթանան 'ի գործն անխոնջ: Եւ այսու ամենայնիւ ուսանին զգործն եւ զբնութիւն գետնին եւ զհաւայն ժամանակացն եւ զեղանակ տարւոյն: Եւ զայս ամենայն տեսութեամբ եւ փորձիւք պարտ է ուսանիլ: