Գիրք վաստակոց

Են ոմանք որ 'ի ցրտային լերինսն 'ի մէկ փոսն երկու երեք ուռ տնկեն, որ թէ ամէնն բռնէ՝ նա լաւ է, եւ թէ ոչ՝ մէկն անսղալ լինի: Եւ արժան է զտունկն 'ի պառակ դնել եւ չդնել 'ի յոտն, զի պառակն լաւ տակ առնու: Եւ զփոսոյն խորութիւնն երկու թիզ արա, եւ զտնկին դնելն աղուոր 'ի համկէք արա, որ չճխմի. եւ թեթեւ ծածկեա, որ արեգական ջերմութիւնն իջանէ 'ի տակսն եւ բնակեցընէ զինքն: Եւ զգետինն այսպէս պարտ է համտեսել. 'ի ջուրն դի՛ր զհողն եւ պղտորեա, եւ ա՛ռ զհամն. եւ եթէ աղեհամ լինի՝ աւազ դիր 'ի տակսն, կամ անոյշ հող, որպէս յառաջն ասացաք: Եւ գիտացիր. փուխ գետինն լաւ է այգեաց համար քան զկաղճինն: Եւ այսպէս արա զճանաչելն գետնոյն. փորեա կանգուն մի, եւ զհողն կուտեա յեզերն փոսոյն, եւ դիր ընկոյզ մի 'ի փոսն, եւ ա՛րկ զհողն դարձեալ 'ի վերայ փոսոյն. եւ տես, թէ փոսն կրկին զիւր հողն իսլիմ առնու, գիտացիր որ փուխ է գետինն եւ գեղեցիկ եւ լաւ. եւ թէ փոսն 'ի հողոյն չառնու 'ի լման, նա կաղճին է եւ վատ տնկի, բայց արտի աղէկ է: