Գիրք վաստակոց

Գիտելի է որ 'ի սպրկիկ եւ 'ի դուր գետինն՝ պարտ է զփոսն տնկին բոլորակ առնել, եւ խորու երկու ոտն եւ լայնութիւն երեք ոտն. եւ ապա 'ի փոսիդ զուռն պերպեռով ցից 'ի վայր զա՛րկ՝ ութ մատն, եւ դի՛ր զտունկն այն օրինակաւն եւ դեղերովն, որպէս գրեցաք յանցելում դրանն. եւ կամ աղբ ոչխարաց լից եւ ապա զհողն 'ի վերայ: Եւ հետեւապէս զամէն տնկմիջերն աղէկ փորեա. եւ 'ի ցախուտ դարուփոս գետինն՝ պարտ է ըստ երկայնութեան պարանին ծայրէ 'ի ծայր խէնտէկ փորել, եւ երկու ոտն 'ի լայն եւ երկու ոտն 'ի խորուն. եւ ապա 'ի տեղն տնկին՝ ուր չափն առնու՝ պերպեռովն զարկ եւ ծակ արա ութ մատն, եւ զտունկն 'ի ներք դիր, եւ զբոլորն տնկին աղէկ ծածկեա. եւ զայլ խէնտէկն 'ի բաց թող երկու տարի. եւ յետ երկու տարւոյն լից աղբով զխէնտէկն, եւ զհանած հողն 'ի վերայ բեր. եւ դուրէ եւ վաստակեա, եւ երեք տարի ապա հօտեա: Եւ տես որ մինչեւ երեք չորս տարիքն լմըննայ՝ յինքն բնաւ սուր չհասուցանես: Եւ այսմ հին իմաստունքն հաւանեալ են, որ թէ հասուցանես կամ հօտես՝ վատուժէ եւ աւերի. զի պիտի որ երեք տարի հանգչին: Ապա զգետինն աղէկ վաստակէ եւ փորեա քանի կարես: