Գիրք վաստակոց

Հինքն բազում ազգ են ասացեալ, բայց մեք աստ զօգտակարն եւ զփորձովն համառօտեցաք, որ է այսպէս: Յորժամ տեսանես զգալն մարախոյն՝ զբնակիչս տեղւոյն առ հասարակ 'ի տունս իւրեանց ած, որ երբ գայ՝ զմարդ ոք 'ի դուրս չտեսանէ, եւ զտեղն 'ի բաց թողու. եւ թէ յանկարծ գայ, որ զայդ չատակէ ոք առնել, դու ա՛ռ զթրմուզն եւ զվայրի խիարկի ցօղունն, լեսեա եւ յիրեար խառնեա եւ 'ի ջուրն արկ որ թրջի, եւ ապա զայն ջուրն 'ի վերայ բուսոց եւ տնկոցն ցանեա. նա ուր այդ ջուրդ հասանի՝ բնաւ մարախն չուտէ: Եւ այլ. տես թէ 'ի սահմանս անդեացն չոր խոտ մոշի կենայ, կամ շամբ, կամ խարձ, յայն պահն վառեա կրակ. նա 'ի ծխէն եւ 'ի կրակին ահէն փախչին: Եւ զառաջ եկեալ մարախսն թէ ծխես 'ի կրակն, ամէնն՝ որ զհոտն առնուն թուլանան եւ 'ի վայր անկանին առժամայն: Եւ թէ զկորն ծխես 'ի կրակն, նա զինչ 'ի մէջ տանն կոր կենայ՝ փախչին. եւ այս բնութեամբ է, որ 'ի ծխելոյն կենդանիքն փախչին: