Գիրք վաստակոց

Առ զպտղի ձիթի տուրտինն եւ օ՛ծ զտան միջգետինսն, լուն սպառի: Եթէ ոք առնու զճապուռն եւ լեսէ, եւ շող ջուր ածէ 'ի վերայ, եւ 'ի տունն ցանէ՝ լուն սատակի առ հասարակ: Առ զվայրի խիարուկն եւ ծեծեա ջրով, 'ի տունն ցանեա. զնոյն գործէ: Եւ թէ ուզես, արա 'ի մէջ տանն փոս մի, եւ ծեծեա զճփոյն տերեւն եւ 'ի փոսոյն մէջն լից. նա ինչ լու կենայ՝ ամէնքն անդր ժողովին: Եւ եթէ ոք առնու զայն վայրի ապիրշումն որ 'ի ծառս լինի, նոյնպէս եւ զպարկուճսն թրթրի փիճւոյն, եւ զինքն եւ զպապունէճն հետ իրերաց եփեա եւ զջուրն ցանեա, զլուն սատակէ: Եւ թէ ոք առնու զծովուն լուն՝ որ ձուկն է եւ իւրն լու ասեն, եւ խաշէ զինքն եւ զջուրն 'ի տունն ցանէ, առ ժամայն սատակէ զլուքն: