Գիրք վաստակոց

Գիտելի է որ ամէն ծմակ տեղւոյ եւ տաք տեղւոյ գինին վատ լինի. զի արեւն 'ի յինքն սակաւ հասանի. եւ այգեաց որք 'ի բարձրավանդակ տեղիս լինի՝ գինին անոյշ լինի, զի օդիցն պարզ գիջութիւնն եւ արեգական պարզ շողն՝ խաղողին սնունդ տայ եւ պահէ եւ հասուցանէ զխաղողն: Նոյնպէս եւ լուսնին ջերմութիւնն տաք եւ գէջ է բնութեամբ եւ հասուցանօղ պտղոցն, զի համաձայն է պտղոցն բնութեան եւ օգտակար եւ հասուցանող. եւ վասն այնորիկ սրեն եւ պարզեալ յիստակեն զխաղողն, եւ զգինին անոյշ առնեն. եւ այսու ճանաչի որ շող տեղեաց գինին պարզ եւ անոյշ է քան զայլ ձիւնամեծ տեղեացն: Եւ գիտելի է, որ երբ բերն սակաւ լինի՝ գինին անոյշ լինի, զի տնկին ոյժն առաւել առնու եւ անոյշ լինի, քան 'ի շատ եղած բերն: