Գիրք վաստակոց

Արժան է զմառանն 'ի միջաշաւիղ տեղ շինել 'ի ջեր եւ 'ի ցուրտ. երկու պատուհան թողուլ, զմէկն ընդդէմ հիւսիսոյ, եւ զմէկ այլն ընդդէմ հարաւոյ. եւ եթէ ցրտային լինի՝ մէկ պատուհան ընդդէմ հարաւոյ: Եւ զմառանն 'ի բարձր տեղ շինեա. բայց զհնձանն ներքեւ եւ ցած, որպէս գրեալ եմք: Եւս առաւել տես որ բնաւ թզենի չլինի 'ի մօտն, եւ ոչ նռնենի, զի յատուկ քացխեցուցանեն զգինին, եւս առաւել ուր մազմզուկքն հասանին՝ խասիաթ ունին: Եւ տես, ո՛ր կարաս որ քացախի՝ 'ի տունն չթողուս. հան մենակ զի զերդ բորն որ 'ի կենդանիսն փոխի 'ի մէկէն 'ի մէկն, նոյնպէս եւ քացախումն 'ի գինիս 'ի մէկէն յայլն փոխի, եւ աւերէ զամէնն: