Գիրք վաստակոց

Ա՛ռ անուշ գինի եօթանասուն մասն, եւ յիստակ մեղր հարիւր մասն, եւ մունֆախդէճ քսան եւ հինգ մասն, յիրեար խառնեա, եւ ա՛ծ մանր աղի կոներ, եւ սակաւ մի սատէճ-հինտի ա՛ծ յամէն աման սակաւ մի, եւ ձիւթեա զբերանն. եւ յետ աւուրց 'ի բան տար: Այլ ազգ. ա՛ռ յիստակ մեղր քառասուն բաժին, եւ եռացո, եւ զփրփուրն ա՛ռ որ սրբի, եւ հովացո եղկ. եւ ա՛ռ կոստ լեսած նուկի մի, չորս տարւոյ հին գինի կամ այլ աւելի՝ ԼԸ բաժին, եւ տերեւ մի սատէճ հինտի. թէ չգտանի՝ թմբուլ դի՛ր աւելի, նա զայն կեցուցանէ. եւ ծեփեա. եւ յետ ԺԵ աւուրն 'ի բան տար. եւ քանի հնանայ՝ լաւանայ: Այլ ազգ. ա՛ռ մուռ երեք տրամ, հայեցի սնֆուլ որ 'ի լեառն լինի՝ նուկի մի. պղպեղ կէս նուկի. կէս լիտր մեղր, եւ անոյշ գինի երկոտասան լիտր, յիրեար խառնեա 'ի թէմուզ ամառն, եւ ծեփեա, եւ յարեւն դի՛ր, որ արեւն զինքն եփէ եւ շինէ: