Վասն որ ի Սուրբ Երուսաղէմ եկեղեցւոյ շինուածք…

       * ՎԱՍՆ ՈՐ Ի ՍՈՒՐԲՆ ԵՐՈՒՍԱՂԷՄ ԵԿԵՂԵՑՒՈՅ ՇԻՆՈՒԱԾՔ՝ ԹՈՒՈՎ ԵՒ ՀԻՄՆԱԴՐԵԼՈՎ. [ԵՒ ԶՍՏՈՅԳՆ ԳՏՑԵՍ ԱՆԴԱՆԱՒՐ ]

       Անձնաչափ Կենարարին Քրիստոսի լայնութիւն տապանափորած վիմին՝ գիրկ եւ կէս։ Հեռի են, ի միջի գմբեթէն , սրբոյ կենարար գերեզմանէն եւ ի վերայ սեանցն՝ գմբեթաձեւ ի վերայ եկեղեցւոյն , որ շինեալ է՝ հարիւր կանգուն բարձրութիւնն եւ հարիւր՝ լայնութիւնն, բոլոր՝ յայն եւ յայն՝ երկոտասան սիւնք ներքոյ եւ երկոտասան՝ վերոյ վերնատանն։ Եւ յայն վերնատանն՝ գեղարդն եւ սպունգն եւ սկաւառակն Քրիստոսի՝ պատեալ ոսկով ։

       Իսկ եկեղեցին Կաթողիկէ , որ Մատուռն անուանի, որ է գիւտ խաչի՝ քսան կանգուն հեռագոյն ի Յարութենէն, վաթսուն եւ հինգ սիւն վեր եւ ի ներքոյ երկայնութիւն։

       Իսկ Սուրբ Գողգոթայի եկեղեցին տասն քայլ հեռի էր ի Յարութենէն, որ Ադամայ գերեզման կոչի, ներքոյ եւ ի վերոյ՝ սեղան խորհրդոյ, յորում խաչեցաւ Քրիստոս ի վիմին վերայ։

       Իսկ Սուրբ Սիոնի եկեղեցին՝ միով ասպարիսաւ բացագոյն ի Յարութենէն, հարիւր կանգուն ի յերկայնն եւ եօթանասուն՝ ի լայնն , ութսուն սեամբք կամարակապաւք։ Եւ չէ վերնատնաւք , այլ թարբ կապեալ է փայտեայ , եւ պսակ փշոյն կայ ի կախ զթարբէն, որ եդին Կենարարին ի գլուխ։ Եւ յաջմէ եկեղեցւոյն ՝ վերնատունն խորհրդոյ եւ փայտեայ գմբեթ , յորում նկարեալ է զընթրեացն խորհուրդ Փրկչին , յորում սեղանն խորհրդոյ։ Եւ պատարագ մատչի եւ ի վերնայարկն Սիոնի ։

       Եւ վերնատունն մի լինի եւ Սուրբն Սիոնի ընդ աջմէ խորանին Պիղատոսի, որ Կապպաթա անուանի, եւ վէմն, որի վերայ կայր Փրկիչն առաջի Պիղատոսի, յորոյ ոտից տեղն երեւի ցարդ եւս, եւ աւազանն ներքոյ նորին, ուր զաշակերտացն լուաց զոտս , եւ յահեկէ Սիոնի բանտն , ուր զՏէրն Քրիստոս արգելին։ Անդ սեղան է, եւ պատարագ մատչի։ Եւ յայնմ տեղւոջ , ուր զՍուրբ Կուսին դագաղսն կալաւ Հրէայն արտաքոյ քաղաքին՝ չտալ թաղել՝ գմբեթ կապեալ ի չորից սեանց եւ սեանցն պղնձի խաչ զգեցուցեալ, որ են մարմարիոնք։ Եւ անդի ցվայր՝ երկուհարիւր եւ յիսուն քարեայ աստիճանք , մինչեւ ցսուրբ գերեզման Կուսին, որ ի ձորն Գեթսեմանի ։ Եւ անդի մինչեւ ի լեառն Ձիթենեաց, ուստի վերացաւ Քրիստոս՝ ութ հարիւր աստիճանք ։

       Իսկ ի տեղւոջն Համբարձմանն՝ ըստ Յարութեան եկեղեցւոյն ձեւոյ գեղեցկահիւս գմբեթաձեւ շինուածք՝ հարիւր կանգուն յերկայնն եւ հարիւր՝ ի լայնն։ Անդի երեւի Յորդանան գետ եւ Հովր լեառնն եւ բովանդակ այլ գաւառքն։

       Իսկ Բեթղեհէմ ՝ հեռագոյն ի Յարութենէն երկու հարիւր եւ քսան հրասախ , յարեւմտից կողմանէ։ Չափ մեծութեան եկեղեցւոյն ՝ երկու հարիւր կանգուն յերկայնն եւ հարիւր ՝ ի լայնն , իննսուն սեամբք մարմարիոնովք, քարեայ կամարակապաւք։ Եւ ի նմանէ է կրկին՝ յայրն , զոր Աբրահամ գնեաց ի կալուածս շիրմացն ։ Եւ ներքոյ բեմին՝ սուրբ այրն եւ մսուրն, ուր՝ սեղան, եւ պատարագ մատչի։ Եւ յաջմէ եկեղեցւոյն ՝ մատուռն, յորում մանկանց՝ սպանելոցն ի Հերովդէէ ՝ նշխարք պահին։

       Եւ անդի յարեւելից կուսէ ըստ Յորդանանու կողմանէ երեք ասպարիսաւք հեռի ի Բեթղեհէմէ հովանոցն, ուր՝ երկու եկեղեցի, եւ պատարագ մատչի։

       Եւ Յորդանան գետ հինգ հրասախ հեռի է յԵրուսաղէմէ, յարեւելից կուսէ, ուր Փրկիչն մկրտեցաւ։ Յորում՝ եկեղեցի սագաշէն խաչանման յարմարեալ, ութսուն կանգուն երկայն , ութսուն՝ լայն, երեք սեղան խորհրդոյ, եւ պատարագ մատչի։

       Եւ լեառն Ձիթենեաց Երուսաղէմի յարեւելից կուսէ լինի։