Տաղեր

Աստուածածին, մայր Քրիստոսի,
Իմ յոյսն դուն աւուր մեծի,
Բարեխօս ընդունելի,
Միթէ քէնով Տէր ողորմի:

Լուսն տվի, զխաւարն առի,
Հուր գէհենին ինձ վառեցի,
Մութն ու խաւար ճանփան գնամ,
Վայ թէ խաւարն ինձ հանդիպի:

Ես Յոհանէսս եմ մեղայկամ,
Զօրն ի հետ մարմնուս ժուռ կու գամ,
Չեմ յիշել զօր դատաստանին,
Հետիոտ ո՞յր պիտի երթամ:

Ահեղ ու մեծ է դատաւորն,
Եփ որ տեսնում, նայ զարմանամ,
Եփ դատաւորն հարցումն այնէ,
Գերիս ամ ո՞նց պացխուն ես տամ:

Սառնամանիքն է պատրաստած,
Եփ որ տեսնում զէտ զուռ դողամ,
Գերիս այնօր մեծ ատէնի,
Ես մեղաւորս ամ ի՞նչ լինամ:

Անքուն որդունքն են ի աշուն,
Թէ ո՞ւսկայ կու գայ անուշ լօղման,
Մարմինս գեր է եւ փափուկ,
Նոքա ուտեն, ես զարմանամ:

Զօրն ու գիշերն անտի շայէն,
Տարէկուսիմ, նստիմ ու լամ,
Եփ զահաւոր դատողն յիշեմ,
Ա՛յ, վա՛խ, հազար վա՛յ ինձ կու տամ:

Չեմ շինել ինձ տուն բարիաւ
Օթեւան` երթամ կենամ,
Տուն զդժոխքն է պատրաստած,
Որ անհամբեր երթամ կենամ:

Գերի Յոհանէս, էս դուն յիմար,
Հետ աշխարհիս ընկար մեղկան,
Մէրկիկ եկիր դուն ի աշխարհս,
Մէրկիկ դնեն հող ՚ւ ի զնտան: