Տաղեր

ԽՐԱՏՔ ՈՄՆ ՆԱԶԱՐԵԹԷ ԱՍԱՑԵԱԼ, ՎԱՍՆ ՄԱՐԴԿԱՆ ՕԳՏԻ

***

Որք բարի են բարուք` նա զուարթ երեսօք,
Եւ որք չար են մտօք` տխուր եւ տգեղ դիմօք,
Որ սիրէ զարծաթ` մի' հաւատար թէ սիրէ զոք,
Որ շողոքորթ եւ գրգռող` լցեալ է չարեօք:

***

Որք առատ են սրտիւ, ո'չ հային արծաթ,
Եւ որք ժլատք են, աչքն մնայ անթարթ:

***

Ժլատից սեղանն նստեալ, թէ հաց ուտես,
Համարեա զայն որպէս թէ մազ կլանես:
Ագահաց տուրք եւ բարիք որչափ շնորհես,
Չերեւի զհետ նորա իբր ի ծով ձգես:

***

Անմտաց բարութիւն առնես, սուտ գտանի,
Իմաստնոց միայն ողջոյն տաս, ո'չ մոռանի:

***

Որ անիրաւութեան ոք համբերէ, նա է սիրելի անգամ,
Եւ որ համբերութիւն արհամարհէ, նա է անմիտ եւ անզգամ:

***

Որ տգետ է բանիւք եւ հեզ է բարուք,
Նա սիրելի է, քան իմաստուն անդուգ:

***

Տգիտաց մխիթարութիւն որպէս են սառ,
Բայց իմաստնոցն բժիշկն են բարբառ:

***

Սիրելի յամենայն ժամօք գտանէ,
Սիրելի այն է, որ նեղութեան օգնէ:

***

Լաւ է նեղութեան ժամանակն օգնել եւ մխիթարել,
Քան թէ դիւրութեան ժամանակն սեղան դնել:

***

Լաւ է ոք պարկեշտ կրոնի,
Քան թէ հանի անուն բարի:

***

Եւ դեռեւս չեղեալն լինայ մի' կարծեր,
Եւ անցեալ գնացեալն դու մի' պարծիր:

***

Որք մտօք ծախեան բարին,
Լեզուօք քաղցրախօս լինին,
Եւ որք կարծիք են չարին,
Դառն եւ նենգօք են բանք նորին:

***

Ի հանդիսի, թէ գով լինի, ով ոք նեղանայ,
Գիտացիր որ նորա սիրտն չար նախանձ կայ:
Եւ թէ ոք բարի լինի եւ քրիստոնեայ,
Նա մտօքն զուարթանայ եւ գոհանայ,
Եւ թէ լինի հարկէ ինչ բանբաս լինայ,
Չարքն զուարճանան, նոյնպէս բարիքն կորանայ:

***

Որոց անուն թէ բարութիւն համբաւի,
Սակաւք թէ բարեկամք լինին, բայց բազումք թշնամի:

***

Որք իմաստուն են բանիւք եւ խոնարհ մտօք,
Նոքա են աստուածապաշտ եւ ուղիղ սրտօք:

***

Նախանձօտ եւ բարկացող անհնար է թէ մարդ հաւանի,
Քսմսողաց եւ զրպարտողաց սիրելի եւ բարեկամ լինի:

***

Լաւ է վիշապ օձին հպիլ,
Քան թէ բանսարկուին հետ յարիլ:

***

Բանսարկուն թէ տեսանէ բարեկամք լեալ են սիրելի,
Որպէս հրով տոչորեալ աղիքն ի փորն գալարի:

***

Եթէ չար ինչ լսէ հեզն` դարձնէ բարին,
Իբր զդառն փոխէ ի քաղցր եղէգշաքրին:

***

Թէ բարի ինչ լսէ, վէսքն առնէ դառինք,
Որպէս թէ շաքար ուտէ օձ, դառնայ ի թունք:

***

Բարեկամ քո ի քեզ յեցեալ անցաւ իրօք,
Համբեր նմա, նա զղջանայ սրտի մտօք:

***

Դու այսպիսի անցաւորաց, եղբա'յր, ներէ,
Յետոյ զղջմամբ միշտ յաւիտեան զքեզ սիրէ:

***

Թէ հանդիպի կին բարի, գտար պահարան գանձի,
Թէ լինի լեզուանի, անկար ի բուռն անզգամի:

***

Եւ թէ ոք զրպարտողաց բան լսելով եղբայրն ատէ,
Նա սիրէ թշնամութիւն, ստասպաս հակառակէ:

***

Եթէ ումեք փոխ տաս, կորուստ համարեա,
Եւ թէ ի քեզ դարձոյց, գտեալ ստուգեա:

***

Թէ ոք բարեկամին փոխ տայ վասն սիրոյ,
Անցցէ բարեկամութիւն վասն դրամոյ,
Թէ ոք անցցէ ապրանաց վասն սիրոյն,
Նա ստոյգ ասպնջական է Սուրբ Հոգւոյն:

***

Թէ ոք չար ինչ ասէ, այլոց մի' հաւատար,
Քան զի յաշխարհս միայն աստուած է արդար:

***

Մի' բանբասեր փոխանակ բանբասանաց,
Ներեա ատելեաց, համբեր նախատանաց,
Զայդ արարեալ նոքա գտանեն ըստ չարեաց,
Յետոյ երանիս սիրելեաց եւ բարեկամաց: