Տաղեր

Նազլու տիլպէր, զալմ քեաֆիր, սեւ աչեր,
Յէ՞ր չես ի գար օրիկ մի զիս հարցաներ:

Շատ եմ քաշեր տէրտ ու զահր քեզ համար,
Սպիտակ ճակատ, բարակ ուներդ է կամար,
Աչերդ ծով, ես, խեղճ, եղայ Նաւավար,
Ղարղ եմ եղեր, ծովուդ ելնել չեմ կարնար.

Նազլու տիլպէր, զալմ քեաֆիր, սեւ աչեր,
Յէ՞ր չես ի գար օրիկ մի զիս հարցաներ:

Գիշեր-ցորեկ քունս է հատեր աչերուս,
Ա՛յ անօրէն, ականջ արա քո գերուս,
Հեքիմ կասեն զքեզ, դեղ արա խոցերուս,
Այս կրակիս այլ չեմ կարեր դիմանար.

Նազլու տիլպէր. զալմ քեաֆիր, սեւ աչեր,
Յէ՞ր չես ի գար օրիկ մի զիս հարցաներ:

Գիշեր-ցորեկ քո սէրն արեր զիս վարամ,
Ա՛յ անօրէն, գէմ քար չեմ, որ դիմանամ.
Քունս չի գար, երթամ պառկեմ քնանամ,
Երթամ լալով պահ մի ժուռ գամ, այլվի գամ.

Նազլու տիլպէր, զալմ քեաֆիր, սեւ աչեր,
Յէ՞ր չես ի գար օրիկ մի զիս հարցաներ:

Գիշեր-ցորեկ ես քո տէրտէն հառաչեմ,
Կուզեմ զանունդ այան անեմ, կամաչեմ,
Ա՜յ անօրէն, միս եմ ՚ւ ոսկոր, գէմ քար չեմ,
Այլ չեմ կարող գաղտուկ ՚ւ ապրել, կու կանչեմ.

Նազլու տիլպէր, զալմ քեաֆիր, սեւ աչեր,
Յէ՞ր չես ի գար օրիկ մի զիս հարցաներ:

Գոհ եմ ի քէն, Յիսուս անմահ միածին,
Նասիպ արիր զաղէկն ինձ դրացին,
Շատ խեւ տեսայ, որ զաղէկնին պահած ին,
Յետոյ զամէնն անտէր թողին, գնացին.

Նազլու տիլպէր, զալում քեաֆիր, սեւ աչեր,
Յէ՞ր չես ի գար օրիկ մի զիս հարցաներ:

Խեւ Ստեփանոս, դու զքեզ խելօք կու կարծես,
Զբարին թողիր, կամաւ զչարն կու գործես,
ԶԱստուածն թողիր, զանգէտ, բոզն կաղաչես,
Ահեղ դատաստանին օրն կամաչես.

Նազլու տիլպէր, զալմ քեաֆիր, սեւ աչեր,
Յէ՞ր չես ի գար օրիկ մի զիս հարցաներ: