ԹՂԹԵՐ

ՊԱՏԱՍԽԱՆԻ ԹՂԹՈՅՆ ՄՈՎՍԷՍԻ Ի ՎՐԹԱՆԻՍԷ
       1  Զգիր(ս) ողջունի սրբութեան քո ընկալեա՜լ, գոհանալով զԱստուծոյ ուրախացայ. զի նախանձաւոր էք ուղղափառ հաւատոյ. եւ ասպնջական սուրբ հարց ճշմարիտ վարդապետութեանն, որ տնկեցաւ յաշխարհս մեր ի ձեռն երիցս երանեալ սուրբ եւ քաջ, եւ անզանգիտող նահատակին տեառն Գրիգորի ։ 2  Եւ զի յապստամբող, եւ ի վերջին ժամանակս հասեալ եմք, ոչինչ են զարմանք տեսանել՝ զոր սրբութիւնդ ձեր գրեաց ։ 3  Քանզի տակաւին եւս տեսանեմք զգուշակութիւն նուիրական առաքելոյն, թէ՝ Հերձուածք լինելոց են ի ձեզ, եւ զայն եւս թէ՝ Որ ընտիրք են ի ձեզ՝ երեւեսցին, զոր ճշմարտիւ սրբութիւնդ քո կատարեաց, հալածանաց եւ բազմապատիկ նեղութեանց համբերելով։ 4  Եւ ի վերայ դորին եղիցի քեզ միշտ արիանալ. եւ անքակելի մնալ շնորհիւն Քրիստոսի Աստուծոյ մերոյ, եւ լրջմտութեամբ ստանալ պարգեւս՝ ի բաւական աջոյն Քրիստոսի։ 5  Իսկ որ ի բազմացն փութայք շահաւորութիւն, ցանկալի է. եւ որ յընկերսիրութիւն ընթանայք՝ աւգուտ տենչալի է. ըստ այնմ, թէ՝ Ոչ խնդրեմ զանձին աւգուտ՝ այլ զբազմաց, զի ապրեսցին ։ 6  Զթուղթն զոր խնդրեցեր ի հայալեզուսն, առնեմք շնորհիւն Աստուծոյ։ 7  Նոյնպէս եւ ի Կիւրոն եւ յիշխանս աշխարհին առնեմք ըստ յառաջելոյն Աստուծոյ։ 8  Եւ եթէ կամի Քրիստոս Աստուած ի մաւտ աւուրս Կաթուղիկոս կամին նստուցանել, զհոգս ձեր շնորհիւն Քրիստոսի Աստուծոյ՝ նա հոգայ եւ մեք սատարեմք մինչեւ ի կատարումն գործոյդ ըստ կարի մերում։
       9  Ողջ լեր ի Տէր։