Տաղեր

Քէէն մինչեւ ի յայբն օրհնաբանութիւն,
Փառք եւ պատիւ յաւէտ երկրպագութիւն,
Իիւսեալ սուրբ հրաշալի Ջուղայոյ Վանից,
Ցանկալի հրեշտակաց եւ սերովբէից:

Րենակ պճնեալ զարդիւք հաստեցաւ վիմի,
Տուն եւ տաճար շինեալ անմահ արքային,
Վանք է հռչակաւոր բարձրաւանդակի,
Սոսկալի տեսողացն եւ հիանալի:

Ռահ երկար գնացեալ, զատեալ ի գեղջէն,
Ջահ, ակն է լուսափայլ անշիջանելի,
Պատուելի հրեղինաց եւ հողեղինի,
Չորէքկողմ յաշխարհիս պարծանք համայնի:

Ո՛վ ամենօրհնեալ սուրբ Աստուածածնի,
Շառաւիղ լուսազարդ Ամենափրկչին,
Նոր դրախտ եդեմական տնկեալ ի յերկրի,
Յորդառատ աղբիւր անհատանելի:

Մանկունք նոր Սիոնի նման հրեշտակի,
Ճրագունք միշտ պատրաստ, մշակ պանծալի,
Ղօղեալք ի դժոխոց, զատեալք ի յերկրէ,
Ձայնիւ օրհնաբանողք միշտ երգ սաղմոսի:

Հովուապետին մեծի լուարուք բանին,
Կատարողք հրամանաց անմահ փեսային,
Ծառայել հրամայեաց Տէրն ամենայնի,
Խաղաղ թող կին, զորդի եւ զսէր աշխարհի:

Լուր, ասէ, առ զխաչն եւ եկ զկնի,
Ի զատանալ չարէաց, կալ յանապատի:
Ժամ եւ պատարագ սուրբ մատուցանէք,
Թողութիւն հայցեցէք մեզ մեղաւորի:

Ընկալցէ զաղաչանս մեր անարժանից,
Էրանելի խոստմանց առնէ արժանի:
Զարքայութիւն շնորհեա մեր ննջեցելոց
Եւ տուր լսել բարբառ քաղցր եւ հեշտալի:

Դառն դժոխոց ազատեա, Փրկիչ,
Գաբրիէլեան փողուն արա արժանի:
Բարեխօսեա առ Տէր, սուրբ Աստուածածին,
Արժան առնել զմեզ տեսութեան դրախտին:

Ազարիա եղուկ, բնակեալ ի գեղջի,
Աղտեղացայ մեղօք լցեալ աշխարհի,
Յերես անկեալ գետին սուրբ Աստուածածնի
Եւ սուրբ կրօնաւորաց դուռն սուրբ ուխտին: