Տաղեր

ԳՈՉԵՄ, ՈՂԲԱՄ, ՄԻՇՏ ՀԱՌԱՉԵՄ

Գոչեմ, ողբամ, միշտ հառաչեմ,
Զօրն ողջոյն, գիշերն ողջոյն,
Ի խոր խոցեալ աղեկիզիմ
Ի սէր իմոյ սիրելւոյն, սիրելւոյն:

Իբրեւ նետիւ վիրաւորեալ,
Վշտանամ ես ի ցաւոյն,
Ո~հ, ո՞վ փութայր առ անձկալին,
Ազդէր նմա ողբալով, ողբալով,
Ո~հ, ո՞վ փութայր առ սիրելին,
Կոչէր զնա գալ առ իս, գալ առ իս:

Րոտեալ ցաւօք վշտաչարչար,
Անկեալ դնիմ ի մահճի,
Յօտար երկիր պանդխտական`
Անձն իմ նեղեալ տագնապի, տագնապի:

Յամենայնի գոյաթափուր, ջրոյ անգամ կարօտի,
Ո~հ, ո՞վ փութայր առ նազելին,
Պատմէր զինէն ողբալով, ողբալով,
Ո~հ, ո՞վ փութայր առ սիրելին`
Կոչէր զնա գալ առ իս, գալ առ իս:

Ինձ հաւաստի է օրինակ,
Տարաբախտիկ այրն անկեալ,
Որ իսկապէս զցաւ հէքոյս
Յառաջագոյն գուշակեալ, գուշակեալ:

Քանզի առ իս ակնարկելով,
Փրկիչն Յիսուս առաքեալ,
Ո~հ, ո՞վ փութայր առ բաղձալին,
Ազդէր նմա ողբալով, ողբալով,
Ո~հ, ո՞վ փութայր առ սիրելին,
Կոչէր զնա` գալ առ իս, գալ առ իս:

Գաղտագողի ելուզակաց,
Եկեալ իմ վրայ հասին,
Մերկեցին զիս եւ գանեցին,
Կիսամահ զիս արարին, արարին,

Ո՛չ գտաւ մի ոք օգնական,
Այլ որք տեսին` զանց առին:
Ո~հ, ո՞վ փութայր առ ըղձալին,
Պատմէր զինէն ողբալով, ողբալով,
Ո~հ, ո՞վ փութայր առ սիրելին`
Կոչէր զնա` գալ առ իս, գալ առ իս:

Ոչ ո՛ք է ինձ աստ մխիթար,
Խնամօղ եւ օգնական,
Այլ միայն տէր իմ արարօղ,
Յոյսն անմահ, վերնական, վերնական:

Որ յօրինակ սամարացւոյն,
Բուժէ զցաւս իմ հոգեկան,
Ո~հ, ո՞վ փութայր առ տենչալին,
Ազդէր նմա ողբալով, ողբալով,
Ո~հ, ո՞վ փութայր առ սիրելին,
Կոչէր զնա` գալ առ իս, գալ առ իս:

Րենական սիրով լցեալ,
Սիրելիդ իմ քաղցրագոյն,
Զայս աղէտ իմ մինչ լուիցես,
Փութայ առ իս կանխագոյն, կանխագոյն:

Թերեւս մինչեւ մեռեալ իցեմ,
Եղէց արժան քոյդ տեսոյն,
Ո~հ, ո՞վ փութայր առ տարփալին,
Պատմէր զինէն ողբալով, ողբալով,
Ո~հ, ո՞վ փութայր առ սիրելին,
Կոչէր զնա` գալ առ իս, գալ առ իս: