Տաղեր

Հեղինակ

Բաժին

Թեմա

Իմացայ թէ աշխարհս ունայն,
Մահկանացու մարդս ամենայն,
Ընդէ՞ր տրտմիմք մեք ընդունայն,
Ուտեմք, խմեմք, ուրախանամք.

Ա'յ, լի'ց ու տուր, ա'յ, լի'ց ու տուր,
Ա'յ, լի'ց ու տուր զանուշ գինին անապական,
Այսօր ալ խմեմք, վաղն ալ խմեմք,
Հետ ձեզ խմեմք, ուրախանամք:

Գարունն եղեւ խիստ զանազան,
Սարեր, ձորեր կանանչացան,
Յերկիրս ամէն զուարճացան,
Պէսպէս ծաղկօքն գովական.

Ա'յ, լի'ց ու տուր, ա'յ, լի'ց ու տուր,
Ա'յ, լի'ց ու տուր զանուշ գինին անապական,
Այսօր ալ խմեմք, վաղն ալ խմեմք,
Հետ ձազ խմեմք, ուրախանամք:

Նման դրախտին եդեմական,
Այգիքն ամէն զարդարեցան,
Վարդն է բացվեր, սիւմպիւլ, ռեհան,
Պիւլպիւլն եկեր կանէ սէյրան.

Արէք երթամք հետ ձեզ պաղչան,
Քաղեմք զվարդն պէկուման,
Ուրախութեամբ նստիմք սեղան,
Խմեմք սիրով եղբայրական.

Տես, թէ աղքատ ես պարտական,
Ուտել խմելն է քեզ հարամ,
Թէ տալացու չունես մարդկան,
Ուրախանալն է քեզ արժան.

Ի յաղօթից եւ ժամատան
Մի' ծոյլ կենար միշտ անխափան,
Ե'րթ վճարեա' զպարտն հոգեկան,
Նի'ստ, կե'ր, խմէ', ասա' զայս բան.

Ո'չ սիրելի, ո'չ ազգական,
Օր նեղութեան քեզ չէ պիտան,
Օտարն չէ օգուտ մարդկան,
Շուտով զընկերն մոռանան.

Սիրել չէ պարտ զսուտ Եւան,
Երբ ունենաս կին սիրական,
Ընդ նմա կեր, խմէ ի տան,
Ցնծա որդւովքդ միաբան.

Իգնատիոս, լից զկթղայն,
Երկու հատն է քեզ բաւական,
Մէկ այլ խմէ ոտից վերայն,
Լինի բաժակն արքայութեան.

Էր Համթեցին ի նաւ նստման,
Սեւ ծովու մէջն ալէկոծման,
Զբաներս ասաց ուրախական,
Խմեմք, ասեմք զհայր մեղայն.