Տաղեր

Սաստիկ հողմոյ հանդիպեցայ,
Յորժամ հնչեաց, սասանեցայ,
Սակաւ մի լուր եւ համբերեա.
Բան ինչ ունիմ ասել քեզ, ծով,
Ծով, ծով, ծով, զալում ծով,
Զիս իմ երկիրն առաքեա, ծով:

Ալիք, որ դուք կու բարձրանայք,
Նաւապետոյքս կու հիանամք:
Ողորմութեան Տեառն յուսանամք.
Բան ինչ ունիմ ասել քեզ, ծով,
Ծով, ծով, ծով, զալում ծով,
Զիս իմ երկիրն առաքեա, ծով:

Հարաւ, յորժամ դու կու հնչես,
Հոգիս ի մարմնոյս կու քակես,
Պոնտոսի ծով, անյատակ ես.
Բան ինչ ունիմ ասել քեզ, ծով,
Ծով, ծով, ծով, զալում ծով,
Զիս իմ երկիրն առաքեա, ծով:

Ամենեցո՞ւն զայս բան կառնես,
Թէ զիս միայն կու տեսանես,
Վախեմ յանկարծ քարին ածես.
Բան ինչ ունիմ ասել քեզ, ծով,
Ծով, ծով, ծով, զալում ծով,
Զիս իմ երկիրն առաքեա, ծով:

Կապուտակ ես, քան զդաղի,
Ազգի մարդկան ես դու լեղի,
Մեծամեծ ձկանց ես տեղի.
Բան ինչ ունիմ ասել քեզ, ծով,
Ծով, ծով, ծով, զալում ծով,
Զիս իմ երկիրն առաքեա, ծով:

Է', իմ աստուած, զիս ազատեա,
Մեղաւոր աբէղէս փրկեա,
Որ եմ տեղաւ ըՍպահանայ,
Բան ինչ ունիմ ասել քեզ, ծով,
Ծով, ծով, ծով, զալում ծով,
Զիս իմ երկիրն առաքեա, ծով: