Տաղեր

Ի գարշութիւնս տղմոյ մեղաց թաւալեցայ,
Բղջախոհեալ զազրատեսակ թաթախեցայ,
Ի ճակաճանս շաղարշարեալ շաղախեցայ.
Մեղա~յ, մեղա~յ, բիւրապատիկ գլորեցայ:

Սուր սլաքաւ հեշտ ցանկութեան խոցոտեցայ,
Ի խայծ վարմից պոռնկութեան ըմբռնեցայ,
Յանզերծելի բանտարգելեալ կաշկանդեցայ.
Մեղա~յ, մեղա~յ, բիւրապատիկ գլորեցայ:

Որպէս ոսկի ի քիթ խոզի աղտեղացայ,
Տռփմամբ փափկից շօշափելեաց փշօք լցայ,
Չար խորհրդօք եւ պիղծ գործօք պէսպէս մեղայ.
Մեղա~յ, մեղա~յ, բիւրապատիկ գլորեցայ:

Ւիւսեալ մասամբք մահաբերօք տգեղացայ,
Նախ կուրութեամբ մտաց աչօք խաւարեցայ,
Անխոկութեամբ յիմարապէս գայթակղեցայ.
Մեղա~յ, մեղա~յ, բիւրապատիկ գլորեցայ:

Քան զաստուծոյ սէրն առաւել զիս կամեցայ,
Ի ցանկութիւն սուտ աշխարհիս հետեւեցայ,
Անյուսութեամբ զհանդերձեալ կեանս չիմացայ.
Մեղա~յ, մեղա~յ, բիւրապատիկ գլորեցայ:

Ի փոփոխման մտաց եղեալ, միշտ յաղթեցայ
Եւ ընկեցիկ եղեալ ի մեղս, անհոգացայ,
Դողմամբ մարմնոյ առ փափկութիւնս յոյժ հեշտացայ.
Մեղա~յ, մեղա~յ, բիւրապատիկ գլորեցայ:

Աղտեղութեամբ ի թարախուտ յաղբ մխեցայ,
Խոնջ առնելով ընդ շունս պոռնիկս վատթարեցայ,
Անվայելուչ արատ աչօք ես հայեցայ.
Մեղա~յ, մեղա~յ, բիւրապատիկ գլորեցայ:

Սաստիկ մոլեալ, աղտեղի բանս շատ խօսեցայ,
Զչարութեան գործն խնդրել ժպրհեցայ,
Յանդգնեցայ, ի կոր կորեայ, կործանեցայ.
Մեղա~յ, մեղա~յ, բիւրապատիկ գլորեցայ:

Էղուկ եւ վայ, կենօք կեցայ, յերկարեցայ,
Ծռիկ գործօք ԾՌԻԿ թուին հանդիպեցայ
Եւ արդ ի քեզ, Տէր, յուսացայ, պաղատեցայ.
Մեղա~յ, մեղա~յ, բիւրապատիկ գլորեցայ: