Տաղեր

Ի տոռունս ծուլութեան մահաչափ մեղաց
Վարակեալ ըմբռնիմ յորոգայթ դիւաց,
Սկսեալ ի բարիս դանդաղ եւ կասկած,
Վաղափուլ խափանիմ, փրկեա զիս, աստուած:

Սիրելով զպարապ զմայրն մեղաց,
Ո'չ երբէք հետեւիմ գործոց արութեանց,
Յոյլ եւ ծոյլ, տարտամեալ, պղերգ եւ քնէած,
Մրափեալ եւ ապշեալ, փրկեա զիս, աստուած:

Ո'չ հայիմ յարեգակն եւ յայլս արարած,
Զի համայն եղանակ զիւր գործ կատարեաց,
Ես մեղաց գործ ունեայ, ջանիւ ժրակաց
Եւ բարեաց խափանեալ, փրկեա զիս, աստուած:

Ւիւսեալ զմասունս չարին պատրանաց,
Հեղգացայ զբարւոյ առնել սկսած,
Ձանձրացայ յաղօթից ՚ւ առաքինութեանց,
Յօրանջեմ, տրտնջեմ, փրկեա զիս, աստուած:

Քամահեալ անփոյթ եմ քանքարոյ շնորհաց,
Անզգոյշ, չորոշեմ զչարն ի բարեաց,
Մեղկացեալ թուլանամ հոգւով եռացմանց,
Յորսացեալ ընկրկիմ, փրկեա զիս, աստուած:

Ի ներքուստ տրտմութեան դեւն խոցոտեաց,
Արտաքուստ արհաւիրք ահից պաշարեաց,
Ի վերուստ օդայնոց յայսոցն չարեաց,
Ի խաւար դժոխոց փրկեա զիս, աստուած:

Առաւել յուսահատ ի գործս մեղաց,
Փոխանակ զի նախկին յուսով զիս խափեաց,
Մրրկեալ խորհրդօք զհոգիս խեղդեաց,
Ի նորին հրապուրից փրկեա զիս, աստուած:

Սոսկապէս սաղմոսեմ լեզուօք առ աստուած
Եւ մտօք արտաքոյ գտանիմ լաւաց,
Նմանեալ հալումաշ ցաւոց խստութեանց,
Անօգուտ մեռանիմ, փրկեա զիս, աստուած:

Էր երբեմն, որ կայի ի մէջ եղբարց եւ հարց,
Այժմ եղէ տարանշատ, դիպեցայ վշտաց,
Թուական ԷՄԻՈՅԺ գրիւ մեզ յայտնեաց,
Ի մեղաց ծուլութեանց փրկեա զիս, աստուած: