Տաղեր

Ի մոլութիւնս սաստիկ հրոյ բարկութեան,
Անմտաբար հետեւեցայ կորստեան,
Աղաղակեմ սրտի մտօք հեծական.
Աստուած քաւեա զմեղաւորս անպիտան:

Սրտմտութեամբ նման օձին նախնական,
Շուն կատաղի, կարիճխայթող ցասմնական,
Առ իս կրեմ զմասունս չարին զամենայն.
Աստուած քաւեա զմեղաւորս անպիտան:

Որպէս զտիկ փքասրտեալ մախական,
Պարսաւելով դսրովեցի զամենայն,
Հայհոյան բանս մինչ առ աստուած վերանան.
Աստուած քաւեա զմեղաւորս անպիտան:

Ւիւծի զկապ սիրոյ եղբարց որոշման,
Կագեմ, կռվիմ համարձակեալ լլկական,
Անժուժկալեալ չարախօսեմ թշնաման.
Աստուած քաւեա զմեղաւորս անպիտան:

Քինապահեալ չարախոհիմ նենգական,
Անհաշտ բարուք, անսանձ լեզուօք գարշաբան,
Պարպատերակ, որ եմ զատումս խոզական,
Աստուած քաւեա զմեղաւորս անպիտան:

Իբրեւ զերկաթ երիթացեալ դիմական,
Ձայն խոշորեալ, աչք համբարձեալ դիւական,
Անիծանեմ եւ հայհոյեմ քրէական.
Աստուած քաւեա զմեղաւորս անպիտան:

Այպանելով, հարկանելով ձաղական,
Տարապարտուց տամ ընկերաց եպերան,
Լինիմ ահեղ դատաստանի պարտական.
Աստուած քաւեա զմեղաւորս անպիտան:

Սիրով շահել զոք ո'չ գիտեմ բանական,
Ո'չ բարկանամ վասն մեղաց ախտական,
Այլ բարկանամ ընդդէմ բարւոյն հեզութեան.
Աստուած քաւեա զմեղաւորս անպիտան:

Էղկելի եմ, դատապարտեալ, ապաբան,
Ասեմ մեղայ բիւրապատիկ զղջական,
Ի մէջ տարւոյս ԷՄԻՈՅԺ թուական.
Աստուած քաւեա զմեղաւորս անպիտան: