Տաղեր

Իրաւամբ մատնեալ, ես եմ մեղաւոր,
Յատենի մեծին ես եմ պարտաւոր,
Առաջի Տեառն հոգւով եւ մարմնով:
Ես եմ պարտաւոր,
Ես եմ մեղաւոր:

Սիրոյն աստուծոյ եղէ հեռաւոր,
Ի սէր աշխարհիս եղէ պատաղվոր,
Սիրոյդ աստուծոյ եղէ նենգաւոր.
Ես եմ պարտաւոր,
Ես եմ մեղաւոր:

Ուխտին առաջնոյ եղէ ես դրժող,
Կնքոյն եւ շնորհին եղէ կորուսող,
Զպարգեւ փչմանն վատնեցի մոլոր.
Ես եմ պարտաւոր,
Ես եմ մեղաւոր:

Ւիւեցեալ աւանդն ի ձիրն բոլոր,
Փառք որդեգրութեան անունն ահաւոր,
Կորուսի վարուքս յոգնախոտոր.
Ես եմ պարտաւոր,
Ես եմ մեղաւոր:

Քարոզ կարգեալ եմ կենացն երկնաւոր,
Առ յոյսն եւ լոյսն մշտնջենաւոր,
Բայց լքեալ զօծումն դրոշմին ճոխաւոր.
Ես եմ պարտաւոր,
Ես եմ մեղաւոր:

Ի խոտսմունս ծածկեալ միշտ երանաւոր,
Զպսակն անկապուտ չե'մ աղերսաւոր,
Երկնից բարձրութեանն եմ գլուխ ի կոր.
Ես եմ պարտաւոր,
Ես եմ մեղաւոր:

Առ ընտանութիւնն եմ վտարաւոր,
Պատույն պետութեան եմ ժառանգաւոր,
Զպատկեր տէրունի եղծի ջնջաւոր.
Ես եմ պարտաւոր,
Ես եմ մեղաւոր:

Սիրոյդ կողկողիմ հովիւ երկնաւոր,
Մոլորեալ ոչխարս հօտիդ բանաւոր,
Նետիւք խոցոտեալ, մեղօք վիրաւոր.
Ես եմ պարտաւոր,
Ես եմ մեղաւոր:

Է թիւ այս ամի լցեալ բազմաւոր,
Հազար եւ հարիւր եւ ԶԻԼ ձայնաւոր,
Հայր մեղայ ասէք ծերոյս յանցաւոր.
Ես եմ պարտաւոր,
Ես եմ մեղաւոր: