Տաղեր

Աւա~ղ, անձն իմ յոյժ տրտմեալ է,
Ղարիպութիւնն զիս նեղեալ է,
Ցաւն յամէն կողմանց պատեալ է.
Սրտիկս դառանացեր կու լայ, հէ~,
Չի դադարիր, կու լայ, հէ~:

Նոր սիրելիքս միտս անկեալ է,
Քուն յիմ յաչերուս հատեալ է,
Միտքս յինէն ցնորեալ է.
Սրտիկս դառնացեր կու լայ, հէ~,
Չի դադարիր, կու լայ, հէ~:

Դժուարի անձն իմ զատեալ է,
Յաշխարհէն իմ հեռացեալ է,
Յօտար յերկիր վտարեալ է.
Սրտիկս դառնացեր կու լայ, հէ~,
Չի դադարիր, կու լայ, հէ~:

Րապաղս մոլեգնեալ է,
Սրտիկս իմ վիրաւորեալ է
Եւ ղամն զիս պաշարեալ է.
Սրտիկս դառնացեր կու լայ, հէ~,
Չի դադարիր, կու լայ, հէ~:

Է', ղարիպիկս բեհեալ է,
Որպէս զփայտ չորացեալ է,
Քան զտատրակ միայնացեալ է.
Սրտիկս դառնացեր կու լայ, հէ~,
Չի դադարիր, կու լայ, հէ~:

Աւուրքն իմ ունայնացեալ է,
Մահու օրս մօտեցեալ է,
Աչերս ի լալոյ պակասեալ է.
Սրտիկս դառնացեր կու լայ, հէ~,
Չի դադարիր, կու լայ, հէ~:

Սէֆիլ Անդրէաս նեղեալ է,
Յօտար երկիր գնացեալ է,
Հասրաթ եւ կարօտ մնացեալ է.
Սրտիկս դառնացեր կու լայ, հէ~,
Չի դադարիր, կու լայ, հէ~: