Տաղեր

Ի նորաջան գրչէս խնդրի,
Առ ձեզ բանիւս յոյժ փարելի,
Ժողովարան ճարտասանի,
Ներակերտողք ի քարտիսի:

Առ որ հայցեմ աղերսալի
Եւ պաղատիմ յոյժ բաղձալի,
Մի' մեղադրել ինձ ծաղրալի,
Զի չեմ հմուտ յայսմ արհեստի:

Այլ զի անվարժ ի չափ տաղի,
Ոտանաւոր ի հանդիսի,
Նորոգ բանիւ աստ ի կարգի,
Կարճի կարճոյ համառօտի:

Արդ լւարուք, որ ըստ կարգի,
Շարայարեալ ի յայս տառի,
Կերտեալ մեծին տէր Ներսէսի,
Հայաստանեաց հայրապետի:

Սկսեալ նախնոյն, որ առաջի
Մաղթանս առ Տէր իւր պաղատի,
Թեպետ միջնորդ յիւր աղէտի
Եդեալ զԱդամ հայր մեր նախնի:

Ամէն ի մատոյ իւրում շնորհի,
Որ սուրբ Հոգւոյն առեալ զհոգի,
Գայ ի հիմանց վերաթեւի
՚Ւ ի նոր օրէնսն բարբառի:

Այլ պարզախօս բանիւ բերի,
Ոչ բառակապ եւ խրթնալի,
Ւիւսմամբ սրբոցն որ ըստ կարգի,
Երկուհազար տամբք աւարտի:

Ուստի այնու ոչ շատասցի,
Շնորհաց բղխումն իւր սուրբ սրտի,
Րամեալ բանիւ յոյժ քաղցրալի,
Դարձեալ կրկնէ զբանն առաջի:

Որպէս սուրբ հայրքն յԵփեստոսի,
Դաւանեցին զաստուած Որդի
՚Ւ ի Նիկիայ եւ Կոստանդնի,
Զնոյն ուղղափառ հաւատ բարի:

Թագաւորին երկնաւորի,
Զնոյն դաւանում ընդ անւանի,
Երգս յօրինեալ խոստովանի,
ԶՅիսուս Որդի Հօր անեղի:

Այլ եւ դարձեալ սկսանի
Եւ ոչ նւազ ինչ արգիլի,
Նոր նորոգէ ի քարտիսի,
Զնախահարս Արշակունի:

Նաեւ ձայնիւ կականալի
Ողբս յօրինէ յԵդեսիայի,
Տալով մանկանց նոր Սիովնի
Սփոփութիւն սգաւորի:

Այլեւ փայտին սուրբ կենսատուի,
Յերգս յոդէ յոյժ հրճուալի,
Ճարտար թովիչ էր սուրբ հօտի,
Իւր անձանձիր տեղօք բանի:

Կենաց աստի նա վճարի,
Յանզրաւական փառսն փոխի,
Աթոռ յազգէն իւրմէ նստի,
Անուն Ներսէս Լամբրոնացի:

Ցօղեալ եւ նա նորին ցօղի
Եւ ի սիրոյն սէր բորբոքի,
Սիրով հոգոյն տէր Ներսէսի,
Ներբողական ճառ բարբառի:

Որով եւ մեք յոյժ փափագելի,
Գաղափարեալ զբան պատուելի,
Ւիւծեալ խօսիւքս ծաղրալի,
Չեղեալ ներհուն ըստ արժանի:

Լայնատարած նորին նուագի
Սա յիշատակ անջնջելի,
Թուական Հայոցս հազարի,
Նսուն ՚ւ երկու թիւ յաւելի:

Աւարտեցաք յայս նահանգի
Հոնաց երկիրս Ղարասուի,
Նաեւ առ ոտս սուրբ Օգսէնդի,
Քսան եւ ութն օգոստոսի:

Ի դառնագոյն ժամանակի
Մահմետ Քարա Թաթար խանի,
Պատճառելով ինչ պատճառի
Յոյժ կողոպտեն զազգս Հայկի:

Րամեալ եւ ինձ` անարժանի,
Գծող բանիս եւ ծաղկողի,
Անիմաստ ձերում շնորհի,
Տուք ողորմի ինձ` Խասպէկի:

Հուպ յիշեցէք յայս կարգի,
Զհայր Անդրէասն իմ մահտեսի,
Իսկ եւ զմայրն իմ անձկալի,
Հանդերձ ծնօղիւք տուք ողորմի:

Մեծապայծառ եւ պատուելի,
Ընտրեալ, մաքուր իմ ուսուցչի,
Ի ձէնջ հայցեմ տալ ողորմի,
Տէր Յոհաննէս քահանայի:

Ծնօղիւք հանդերձ իւր սուրբ զարմի,
Գերապաճոյճգեղգեղալի,
Րախճանապէս միշտ անթերի,
Յիշել յաղօթս հաճելի:

Արդ աղաչեմ ես կրկնակի,
Ձայնիւ մաղթեմ կողկողալի,
Գովեալ մանկանց նոր Սիովնի,
Վերծանողաց յայսմ տառի:

Րոտեալ անձն իմ երկիւղալի,
Թէ սխալանս աստ գտանի,
Եւ թէ աւել է` ջնջելի,
Եւ թէ պակաս` լնուլ զտեղի:

Արդ արասցուք աւարտ բանի,
Յիսուս Որդոյս յիշատակի,
Լոյսն ի լուսոյ Հօրն անեղի,
Փառք յաւիտեանս յաւիտենի: