Տաղեր

Ի քեզ յուսամ, հոգով տաճար անեղին,
Կոյս Մարիամ, ծնօղ եւ մայր Արարչին,
Զծնեալդ ի քէն Յիսուս աստուած դաւանիմ
Եւ զծնօղդ Աստուածածին խոստովանիմ:

Խոստովանիմ զանճառ բանն հայրական,
Որ ի ծոց Հօր ծնեալ նախքան զաւիտեան,
Էջ աւետեօք յարգանդ քո սուրբ կուսական,
Մաքրազարդեաց զկուսութիւնդ անապական:

Անապական տաճար բանին մայր եւ կոյս,
Յամէն լեզուէ օրհնեալ պտուղ քո եւ բոյս,
Զքեզ ունիմ միջնորդ, կենաց ճար եւ յոյս,
Ի նեղութեան ժամոյն օգնեա եղկելոյս:

Սափոր ոսկի մանանային երկնաւոր,
Հրեշտակապետք եւ հրեշտակք քեզ սպասաւոր,
Դու թագուհի, Որդիդ յերկնից թագաւոր,
Քան զքերովբէսն գտար բարձր եւ փառաւոր:

Պարտէզ փակեալ աստուածատունկ եդեմայ
Եւ առաքումն քո ի դրախտ նռնենայ,
Դու ծառ կենաց, անմահ տնկոյն յԱդինայ,
Պտուղդ աստուած, երանեալ կոյս գերակայ:

Երկրպագեմ սրբոյ կուսիդ բերկրական,
Որ ի Տեառնէ լցար շնորհիւ զանազան,
Քեզ երանեն ազգք եւ ազինք ամենայն,
Զի դու ես մայր կենաց մեզ անմահութեան:

Կողկողելով հայցեմ ի քէն, մայր Բանին
Միջնորդ եւ բարեխօս անճառ անհասին,
Դու աղաչեա վասն իմ Որդիդ միածին,
Զի դասեսցէ ընդ դասս ընտրեալ իր հօտին:

Էրագընթաց ամանակիս թիւ հազար,
Հարիւր ՚ւ երկոտասան ընդ իւր միաշար,
Ի Խասպէկէ լցեալ մեղօք չարաչար,
Մակագրեցաւ երգս ի քարտիս ի նորաշար: