Տաղեր

Արեկ, որ պաղչան մտնումք ու վարդ քաղեմք ծաղկած յայգին,
Պիւլպիւլն ու տուտի ղումրին եղանակեն կանանչ թփին,
Ուրախանան հետ կարմիր վարդին, հետ ճերմակ վարդին:

Գունզգուն ծաղկունքն եկեալ աւետաբերք եղեն պիւլպիւլին,
Մանուշակ ու հազրվարդ մատուցանեն կանանչ թփին,
Ուրախանան հետ կարմիր վարդին, հետ ճերմակ վարդին:

Ղարէնֆիլ շնորհատեսակ, դու նօնոֆար ծաղիկ ծովային,
Լեճվերտի սիւմպիւլ Հինտի, տիպ տենչալի կանանչ թփին,
Ուրախանան հետ կարմիր վարդին, հետ ճերմակ վարդին:

Շառաւիղ շիկնագունիկ դու համասփիւռ ծաղկանց ամիրայն,
Խնկենի լեառն զմռսոյ, շուշան հովտաց կանանչ թփին.
Ուրախանան հետ կարմիր վարդին, հետ ճերմակ վարդին:

Նորատունկ նշդարենի նախածաղիկ գուշակող գարնան,
Լիմոնի, նարնճէնի, գունով ծիրան, կանանչ թփին.
Ուրախանան հետ կարմիր վարդին, հետ ճերմակ վարդին:

Նռնենիք զուգաշար, մարգարտաշար, խիստ զարմանազան,
Համն անուշ, հոտիկն անուշ, քան զնուշն անուշ, կանանչ թփին.
Ուրախանան հետ կարմիր վարդին, հետ ճերմակ վարդին:

Արտուտիկ ու կարկաչուն կարմիր կաքաւ, գարնան ծիծըռնիկ,
Սիրամարգ ոսկի թեւով, նախշուն թեպրով, կանանչ թփին,
Ուրախանան հետ կարմիր վարդին, հետ ճերմակ վարդին:

Խորոտիկ ու լուս երես, աղվոր երես, տիպ արեգական,
Բոլորեալ պետր լուսին, ծագեալ յայգին, կանանչ թփին,
Ուրախանան հետ կարմիր վարդին, հետ ճերմակ վարդին:

Համօրէն ծաղկունքն ամէն ժողովեցան սիրով ի յայգին,
Ճաշակեն զանուշ գինին ի թաւ շքին, կանանչ թփին,
Ուրախանան հետ կարմիր վարդին, հետ ճերմակ վարդին:

Մեղեդիք եւ շարական, ձայնաւորօք տաղ Հոմերական,
Պարարեալ քաղցր ձայնիւ եղանակեն կանանչ թփին,
Ուրախանան հետ կարմիր վարդին, հետ ճերմակ վարդին, հետ բարեկամաց: