Տաղեր

Մաքուր տաճար եւ բնակարան անմահին, անմահին,
Որ մայր եղեր անճառ բանին` Միածնին, Միածնին,
Նայեա ի յիս քաղցր դիմօք, Տիրածին, Տիրածին:

Խոցեալ սրտիւ, բեկեալ ողբմամբ, պաղատիմ, պաղատիմ,
Ձեռս զմիջով, կորագլուխ, հառաչեմ, հառաչեմ.
Նայեա ի յիս քաղցր դիմօք, Տիրածին, Տիրածին:

Ի յորսողաց որոգայթից ազատեա, ազատեա,
Ուղիղ շաւղօք առաջնորդեա, աղերսեմ, աղերսեմ,
Նայեա ի յիս քաղցր դիմօք, Տիրածին, Տիրածին:

Թշնամիք իմ հասին յետուստ, պատեցին, պատեցին,
Յափշտակեալ ձեռն արկանեն, ապրեցո, ապրեցո,
Նայեա ի յիս քաղցր դիմօք, Տիրածին, Տիրածին:

Արտասուաթոր հեծեծանօք դանդաչեմ, դանդաչեմ,
Հա'ս օգնութեան պաշարելոյս, աղաչեմ, աղաչեմ.
Նայեա ի յիս քաղցր դիմօք, Տիրածին, Տիրածին:

Րենական լուսոյ որդոյդ զրկեցայ, զրկեցայ,
Խաւարասէր իշխանք մահու տիրեցին, տիրեցին.
Նայեա ի յիս քաղցր դիմօք, Տիրածին, Տիրածին:

Ծափս-ծափէ հարեալ կարդան վա~շ մեզ, հէ~յ, վա~շ մեզ, հէ~յ,
Զի ընկլուզեալ արագ զնա, զօրացո, զօրացո.
Նայեա ի յիս քաղցր դիմօք, Տիրածին, Տիրածին:

Առասանօք պրկեալ քարշեն, ճարճատեմ, ճարճատեմ,
Անօգնական լեալ ումեքէ, խորտակեմ, խորտակեմ.
Նայեա ի յիս քաղցր դիմօք, Տիրածին, Տիրածին:

Ռամք չարեաց բոլորապատ կանգնեցին, կանգնեցին,
Մի ըստ միոջ հարեալ նետիւք, խոցեցին, խոցեցին.
Նայեա ի յիս քաղցր դիմօք, Տիրածին, Տիրածին:

Արագ-արագ խողխողեցին մեռուցին, մեռուցին,
Դօփեն ոտիւք, կայթեն, ձեռօք, ղօղանջեն, ղօղանջեն.
Նայեա ի յիս քաղցր դիմօք, Տիրածին, Տիրածին:

Յորդահոսիւ, առատաբուխ վտակօք, վտակօք,
Առ ոտս անկեալ քո եւ հայցեմ` ողջացո, ողջացո.
Նայեա ի յիս քաղցր դիմօք, Տիրածին, Տիրածին: