Հաւաքմունք ի գրոց պատմագրաց յաղագս գիւտի ժամանակաց անցելոց մինչեւ ի ներկայս

Նախնի մարդն Ադամ, յետ ելանելոյն ի դրախտէն, լեալ ամաց ՄԼ. ծնանի զՍԷԹ յԵւայէ կնոջէ իւրմէ. եւ եկաց այլ եւս ամս Չ. մինչեւ ի ՃԼԵ. ամն Մաղաղիէլի, ծնանի այլ ուստերս եւ դստերս, մեռանի, ՋԼ. ամաց:

Սէթ լեալ ամաց ՄԵ. ծնանի զԵնովս, յԱզովրայ կնոջէ իւրմէ. եւ եկաց այլ եւս ամս, ՉԷ մինչեւ ի Ի-երորդ ամն Ենովքայ ծնանի ուստերս եւ դստերս, եւ մեռանի, ՋԺԲ. ամաց:

Ենովս` լեալ ամաց ՃՂ. ծնանի զԿայինան ի Նուենայ կնոջէ իւրմէ. եւ եկաց այլ եւս ամս ՉԺԵ. մինչ ի ԾԳ. ամն Մաթուսաղայի, ծնանի ուստերս եւ դստերս, մեռանի ՋԵ. ամաց:

Կայինան` լեալ ամաց ՃՀ. ծնանի զՄաղաղիէլ` ի Մաղաղեդայ կնոջէ իւրմէ.

եւ եկաց յայլ եւս ամս ՉԽ. մինչեւ յ՚ՁԱ. ամն Ղամեքայ. ծնանի ուստերս եւ դստերս, եւ մեռանի ՋԺ. ամաց:

Մաղաղիէլ` լեալ ամաց ՃԿԵ. ծնանի զԿարեդ ի Դինայ կնոջէ իւրմէ. եւ եկաց այլ եւս ամս ՉԼ. մինչ ի ԽԸ. ամն Նոյի, ծնանի ուստերս եւ դստերս եւ մեռանի ՊՂԵ. ամաց:

Յարեդ` լեալ ամաց ՃԿԲ. ծնանի զԵնովք ի Բառաքայ կնոջէ իւրմէ. եւ եկաց այլ եւս ամս Պ. մինչեւ յ՚ՄՁ. ամն Նոյի, ծնանի ուստերս եւ դստերս եւ մեռանի ՋԿԵ. ամաց:

Ենովք` լեալ ամաց ՃԿԵ. ծնանի զՄաթուսաղայ` ի Կադներայ կնոջէ իւրմէ. եւ եկաց այլ եւս ամս Մ. հաճոյ եղեալ Աստուծոյ` փոխեցաւ յամի ԼԳ. Ղամեքայ, ծնանի ուստերս եւ դստերս. փոխեցաւ ՅԿԵ. ամաց:

Ժողովեն յԱդամայ մինչեւ ի փոխիլն Ենովքայ ազգք Է. եւ ամք ՌՆՁԷ.

Մաթուսաղա լեալ ամաց ՃԿԵ. ծնանի զՂամեք ի Կետնայ կնոջէ իւրմէ, եւ կեցեալ այլ եւս ամս ՊԲ. սմա անցանել զջրհեղեղաւն ամօք Ձ. որ զկենաց նորա զթիւ յայտ առնէ, իսկ եթէ որպէս յայլ օրինակս կայ` եկաց այլ եւս ամս ՉՁԲ. ծնանի ուստերս եւ դստերս. մեռանի ՋԿԹ. ամաց:

Ղամեք լեալ ամաց ՃԿԸ. ծնանի զՆոյ ի Բետնայ կնոջէ իւրմէ, եւ եկաց այլ եւս ամս ՇԼԵ յառաջագոյն քան զհայր իւր զՄաթուսաղայ վախճանի Ղամեք, եւ եկաց այլ եւս ցամս Նոյի, ՇԼԵ. ծնանի ուստերս եւ դստերս, մեռանի ՉԻԳ. ամաց:

Նոյ լեալ ամաց Շ. ծնանի զՍեմ, զՔամ, եւ զԱբեթ ի Նոյեմզարայ կնոջէ իւրմէ, եւ եկաց այլ եւս ամս Ճ. մինչեւ ցջրհեղեղն, եւ յետ ջրհեղեղին ամս ՅԾ. մեռանի ՋԾ. ամաց: Ժողովեն ի փոխմանէն Ենովքայ մինչեւ ցջրհեղեղն ազգք Գ. ամք ՉԾԵ. իսկ յԱդամայ ազգք Ժ. ամք ՍՄԽԲ: